Сәуір айының 17 жұлдызы Абай ауданындағы барлық ауылдық округтерде соғыс және тыл ардагерлеріне Қазақстан Республикасы Президентінің 2015 жылдың 19 қаңтардағы № 992 Жарлығымен «Жеңіске 70 жыл» мерекелік медальдары табыс етілді. Аудан бойынша 228 ардагерге мерекелік медальдар мен гүл шоқтары тапсырылды. Медальға қосымша 35 мың теңге көлемінде біржолғы қаржылай көмек те бар.
{jcomments on}Иә, сұрапыл соғыс қайсыбір жанның қабырғасын қайыстырмай қоймады десеңізші. Соғыс өртін, халқымыздың басына төнген нәубет күндерді жұртшылық ешқашан ұмытпақ емес. Адамзат тарихындағы ең бір алапат соғыстың талай ұрпақтың санасына сан ғасырлық жүк артарлық ауыртпалық салғаны, жарынан айырылған ананың, әкесінен көз жазып қалған баланың тағдырын қан жылатқаны, талай-талай отбасының шаңырағын шайқалтқаны мәлім. Төрт жыл бойы 1418 күн мен түнге созылған жанқиярлық соғыста қаншама қазақ жасы қанды қырғында қаймықпай жаумен арпалысты. Соғыс желкілдеп өсіп келе жатқан қаншама жалынды жастарымыздың балалық бал қызығын ұрлады. Сол шақта тыл даласында да үлкендермен қатар ең бір ауыр жұмыстарды қабырғасы қайыса атқарды өмір ерте есейткен қазақ баласы.
Сондықтан да бүгінгі тәуелсіз еліміздің алтын қоры, қазынасы болып отырған қарт майдангерлерімізге, тыл ардагерлеріне қандай құрмет көрсетсек те, артық болмас еді. Осындай құрметке толы жиын Қарауыл ауылында да болып өтті. Ауыл әкімі Қ.Берлешов 90-ға тарта ардагерге мерекелік медальдарын табыс етті. Мерекелік жиында ән шырқалып, жас ұрпақ патриоттық бағыттағы өлеңдерін оқыды.
Бұлбұл ӘНУАРБЕКҚЫЗЫ,
«Семей таңы»
