Абай атындағы қазақ музыкалы драма театрында Абай Құнанбайұлының 170 жылдығына орай М.Әуезовтің «Абай» трагедиясы сахналанып, спектаклінің премьерасы сәтті шықты.
{jcomments on}Спектакль екі бөлімнен тұрып, екі сағаттан астам қойылымды көрермен қауым тапжылмай отырып тамашалады. Зиялы қауымның елегінен өткен спектакль жұрттың назарынан шыға білді. Қойылымға театрдың барлық шығармашылық ұжымы бір кісідей атсалысып, әркім өз рөліне тыңғылықты дайындалғаны байқалды. Осы ретте спектакль режиссері Ербол Жуасбек екенін ескере кеткен жөн. Қойылым көрермен қауымға да терең ой тастап, философиялық мағынасымен де ерекшеленді. Спектакль хакім Абайдың толысып, кемелденген шағын, ел ағасы болған кезін көз алдымызға әкелгендей. Ақынның әлеуметтік көзқарасы сипатталып, әділдігі мен адамдығы, жоғары пайым мен парасаты көрсетілді. Абай рөлін ҚР-ның халық әртісі Бекен Имаханов сомдады. Осыдан отыз бес жыл бұрын қойылған осы спектакльде Бекен Имаханов осы Абай рөлін сомдаған екен. Міне, араға 35 жыл салып, Бекен ақсақал киелі сахнада тағы да рөлді ерекше сипатта өрбітті. Абайдың жары Әйгерімді сомдаған ҚР-ның мәдениет қайраткері Айжан Манекина мен ҚР-ның мәдениет саласының үздігі Сәндібала Бекбаеваның сомдаған бейнелері ерекше көрінді, терең образды, тағылымды дүние жасай білді. Ажарды сомдаған Әсел Нұрланова мен Айдардың рөліндегі Нұрлан Хасихан көрерменді бірден баурады. Қазақстанның еңбек сіңірген қайраткері Болат Ноғайбаев Оразбайдың мінезін сәтті шығарды. Жиреншені сомдаған Едіге Ақылбеков, жас та болса, өз дәрежесінде биіктен көрсете білді. Талай даулы мәселеге араласқан Жиреншенің өткір тілі мен өткір жүзін Едіге ел алдына алып шықты. Рөлдерді сомдаған әрбір жанның өз ерекшеліктері мен өзіндік тұлғалық пайым-парасаттары, актерлік шеберліктері анықталды. Көрермен қауым да тың қойылымдар мен классикалық туындылардың премьерасы жиі болсын деген тілекпен тарады.
Мерей ҚАРТОВ,
Абай атындағы театрдың
әдебиет бөлімінің меңгерушісі.
