{jcomments on}Жеңістің 70 жылдығына орай оқушыларға Отан үшін жан қиған жауынгерлердің, қазіргі таңда ардагерлердің ер-ліктерін үлгі ете отырып, оларды құрметтеуге, елжандылыққа, отансүйгіштікке, батылдыққа тәрбиелеу мақсатында «Ерлігің ел есінде, өшпес кітап бетінде» атты соғыс ардагері Қанағат Ағыбаевқа арналған еске алу кеші болып өтті. Қыршыннан қиылған боздақтар мен майдангерлерді бір сәт еске алып, бір минут үнсіздік жарияланды. Слайд арқылы Қанағат атаның соғыстағы ерлігі мен бейбіт өмірдегі еңбек жолдары көрсетілді, өмірбаянына қысқаша шолу жасалды. Оқушылар әдеби-музыкалық монтаж көрсетті. Жазушы Баубек Бұлқышевпен «Майдандағы кездесу» сәтінен оқушылар үзінді қойылым көрініс көрсетті. Қанағат Ағыбайұлы 1943 жылы Баубек Бұлқышевпен майдан шебінде танысып, етене араласып бір атаның баласындай болып кетеді. Майдандас досы қаза болғанда командирі Махровтың көмегімен Баубек Бұлқышевті Днепропетровск облысының Софиев ауданы Ново Юльевка селосына өз қолымен жерлеген. Басына аты-жөнін, туған жылын, өткен мерзімін тақтаға ойып жазып кеткен. Бұл әңгіме жазушы Әбу Сәрсенбаевтың «Замана біздікі» атты кітабында жазылған. Қанағат атаның ұрпақтарына құрмет көрсетіліп, «Ағыбаев Қанағат» атындағы 6 сынып оқушылары мерекелік концерт қойды. Қанағат Ағыбаевтың қызы Гүлнар Ағыбаева сол бір отты жылдарда балғын ұрпақ сенің болашағың үшін жанын аямай орасан зор қайсарлық, батырлық көрсеткен ержүрек жауынгерлерді бүгінгі күнде еске алып, ұмытпай есімдерін тарихта жаңғыртып отырғандарына, әкелеріне арнап осындай іс-шараны ұйымдастырушыларға ризашылығын білдірді. Шара «Желбірейді туымыз» әнімен аяқталды. Қанағат атаның балалары мен оқушылар майдангерлердің құрметіне ескерткішке гүл шоқтарын қойды.
А. ДЮСЕБАЕВА,
Қапанбұлақ ауылы, Жарма ауданы.
