Жеңістің жетпіс жылдық мерекесі қарсаңында Ақжар ауылында Дәулетбай батыр-ға ескерткіш орнатылды. Тарбағатай аудандық әкімдігі және «Дәулетбай» қоғамдық қорының қолдауымен қызыл граниттен жасалған бұл ескерткішті Алматыдан Қазақстан халқы Ассамблеясының он бір ұлттың өкілдерінен құралған керуені аудан орталығынан жүріп өтіп, Ақжар ауылына алып келді. Сол күні Ақжардағы Мәдениет үйінде батыр бабамыздың даңқты өмір жолы жайлы белгілі жазушы Н.Ақышевтің ұйымдастыруымен респубикалық ғылыми-практикалық конференция болып, оған қоғам қайраткерлері, саясаттанушылар, тарихшылар, ғылыми зерттеушілер қатысып, тұжырымды ойларын ортаға салды.
{jcomments on}Белгілі саясаттанушы Е.Сайыров Дәулетбай бабамыз туралы Қытай мұрағаттарындағы деректерге сүйене отырып әңгімелеп, ол кісінің аса ірі дипломат болғанын, заманында елдің ішкі-сыртқы саясатына араласқанын мысалға келтірді. Белгілі журналист-жазушылар Е.Бапи және Ж.Игісін Дәулетбай батырдың өнегесін бүгінгі ұрапаққа үлгі ету, батырдың туын музейге орналастыру мәселесін қозғады. Қас батыр Қабанбай бабамыз сенімді серігі ретінде өзінің ақ туын Дәулетбай батырға аманат етіп тапсырған екен. Өскемен қаласының бір көшесін Дәулетбай батырдың есімімен атау мәселесі де айтылды. Конференцияда, сонымен қатар Ақжардағы Абай атындағы орта мектептің тарих пәнінің мұғалімі Қуаныш Қабидолдин Қабанбай мен Дәулетбай батырлардың ерліктері мектеп бағдарламасында деген тақырыпта баяндама жасады.
Ескерткіштің ашылу салтанатында Тарбағатай ауданының әкімі Ділдабек Оразбаев құттықтау сөз сөйлеп, батыр бабаны мәңілік есте қалдыру мақсатында оның есімін «Маңырақ» ауылына беру мәселесі қарастырылып жатқанын айтты. Салтанатты сәтте, сондай-ақ облыс әкімінің кеңесшісі Т.Түсіпбекұлы, бабамыздың ұрапғы З.Тоқтарғазыұлы, Б.Қайсанов, Б.Камалханұлы, «Дәулетбай» қорының төрағасы С.Тыштыбаев жылы лебіздерін білдірсе, айтыскер ақын Серік Құсанбаев жырдан шашу шашты. Осындай қуанышты сәтте ҰДҚ тең төрағасы Сәдібек Түгел мен «Ел бірлігі» одағының президенті Шолпан Бостанқызына, мүсінші Т.Сейітовке, ескерткіштің авторы О.Жұмабековтарға халықтың алғысы шексіз болды.
Осы шараға ұштастырыла ұйымдастырылған ақындар айтысын тыңдап, аламан бәйгені тамашалаған ақжарлықтар мен той қонақтары мерейлері өсіп, мәртебелері биіктеп, көтеріңкі көңілмен тарасты.
Хамза СӘТИЕВ,
«Семей таңы»
