Жеңіс мерекесі Тарбағатай ауданының әр ауылында есте қаларлықтай ерекше әсерлі жағдайда аталып өтілді. Мереке күнгі шаралар 9 мамырда Ақсуаттағы белгісіз солдат ескерткішіне гүл шоқтарын қоюдан басталды. «Мәңгілік Ел» саябағының қасындағы орталық алаңда салтанатты жиын болып, онда аудан әкімі Д.Оразбаев, еңбек ардагері Т.Нұрғалиев, №2 Ақ-суат орта мектебінің оқушысы Айбек Жанахметов құттықтау сөз сөйледі. Жас сарбаздардың мерекелік шеруі, мекеме ұжымдарының соғыс және еңбек тақырыбындағы театрландырылған көріністері, Кандюрин шекарасы жауынгерлерінің Отан шебіндегі қырағылықты насихаттайтын көріністер мен концерті әсіресе мектеп оқушылары мен жастарды қызықтырды.
{jcomments on}«Ешқашан ұмытылмайтын ерлікке тағзым» деген тақырыпта аудандық мәдениет бөлімінің өнерпаздары дайындаған концерт-спектакль де жаңашылдығымен есте қалды. «Томирис» бишілер ансамблінің шеберлігі де талайды тамсандырды.
Құйған ауылында тұратын соғыс және еңбек ардагері Қинаят Қожариянов ақсақал мереке қарсаңында Елбасының Жарлығы бойынша «Құрмет» орденімен марапатталған болатын. Жоғары дәрежелі орденді Қинаят атаға Тарбағатай ауданының әкімі Ділдабек Оразбаев салтанатты түрде табыс етті.
— 1942 жылдың қазан айының екісі күні әскер қатарына шақырылып, Украинадағы 438-ші атқыштар полкінің құрамында майданда көптеген шайқастарға қатыстым. Соғыстың аты соғыс. Ол ешкімге опа таптырмайды. Енді соғыс болмасын! Дүниенің бүлініп, қирағанынан сақтасын! Менің аталық тілегім осы. Сұрапыл соғыста үш рет жараландым. 1947 жылы сәуір айында туған жеріме, «Жас еңбек» колхозына оралдым. Замандасым Бану екеуіміз 9 бала тәрбиелеп өсірдік. Бүгінде олардан 22 немере, 15 шөбере өрбіді. Қазіргі күнде осы ұрпақтарымның ортасында қызық-қуанышқа кенеліп отырған жайым бар. Бүгінгі ұрпақ бейбітшіліктің бағасын, егемендіктің қадірін сезініп өссе екен. Еңбегімді бағалап, құрметтеген Елбасына айтар алғысым шексіз, — дейді қадірменді қария.
Хамза СӘТИЕВ,
«Семей таңы»
