Қантөгіс соғыстың аяқталып, бейбіт күннің нұрлы шуақ төккеніне де 70 жыл толып отыр. Жеңістегі жауынгерлік рухты дәріптеуге Қайнар орталықтандырылған кітапхана жүйесі үнемі көңіл аударып келеді. Жыл сайын атаулы күнге арналған мерекеге қарт майдангерлерді шақырып, жас оқырмандармен кездестіріп, құрмет көрсетуді дәстүрге айналдыруда.
{jcomments on}Жеңістің 70 жылдық мерейтойына сәйкес, кітапхана мен балалар музыка мектебі ұжымдары ауылымыздағы жалғыз қарт майдангер Нұрқасым Әжітаев атамен кездесу кешін ұйымдастырды. Кездесуде кітапхана директоры Т.Ахметов құттықтау лебізін жеткізіп, соғыс және еңбек ардагеріне зор денсаулық, ұзақ ғұмыр, отбасына амандық тіледі. Мерекелік шарада М.Оспанова жетекшілік өтетін Бегалин атындағы жалпы орта білім беретін мектептің оқушылары отты жылдары шыққан өлеңдерді оқыды. Саз мектебі жанынан ұйымдастырылған «Көкейкесті» ансамблі күмбірлете күй орындады. Әнші С.Рақышев ұстазы, күйші Е.Сағындықов шығарған «Рабымды ойла бір сәтке» әнін шырқатты.
Қарт майдангер кітап оқырмандарына санасында қалған алапат күндердің әлі көз алдында екенін әңгімеледі. Соғыс аяқталып, Жеңіс таңы атқан соң Жапонияда диверсанттардың бас көтеруін тоқтатуға қатысқаны туралы сөз қозғады. Кеудесі орден,медальдарға толы қарт жауынгер Нұрқасым қажы Әжітаевқа сыйлық тарту етілді.
Иә, аға бұынның от жалынды жылдардағы ерлік істері ұрпақтарға өшпес өнеге, өлмес мұра болып қала бермек.
Қазима ҚАЖЫБЕКОВА,
«Семей таңы»
