7 мамыр – Қазақстан Қарулы Күште-рінің құрылған күні мерекесі Семей қаласында да кең көлемде аталып өтті. Бұл күні Орталық алаңда қаламыздағы өнерпаздар ұжымдары мен “Шығыс” өңірлік әскери қолбасшылығының ұйымдастыруымен мерекелік концерт болып өтті.
{jcomments on}Шаһар тұрғындарына мерекелік көңіл — күй сыйлау үшін әскерилер жоғары даярлықпен келіпті. Әсіресе патриоттық рухтағы асқақ әндерге молынан кезек берілді. Бұл ретте қаламыздағы өзге де өнерпаздар өнер көрсеткенін айта кету ләзім. Атап айтсақ, кілең жігіттерден тұратын «Ертіс» триосы, «Кербез» және «Інжу» би топтарының өнерлеріне көпшілік ерекше қошемет білдірді.
Ал Гарнизондық офицерлер үйінің «Айдана» би тобы ерлік пен өрлік қатар өрілген әдемі музыкалық композициядан тұратын тартымды би орындады.
Сонымен қатар қалалықтарға мерекелік тарту ретінде Балет мектебінің өрендері де арнайы қойылым әзірлеген екен. Жарасымды би қимылдары жеткіншектердің бұл өнер түрін кәсіби деңгейде меңгергендіктерін айғақтап тұр еді. Десек те Отан қорғаушылар мерекесінде отаншылдық тақырыбындағы әндер баса орындалды. Патриоттық сарындағы асқақ рухты туындыларды алаңға жиналған көпшілік тіпті әншілермен қосыла шырқады.
Концерттік бағдарламаның репертуар қоры аса бай екен. Дәстүрлі әндер заманауи әуенмен әдемі үндестік тауып жатты. Мәселен, Гүлдана Ноғайбаеваның орындауындағы «Исаның желдірмесі» тыңдарманын тәнті етпей қоймады. Ал мерекелік салтанатты кештің соңы қаламыздағы әскерилердің балдық биіне ұласты.
Жалпы, бұл күні Семейдегі халық көп жиналатын қоғамдық орындарда да мерекелік шаралар ұйымдастырылғанын айта кеткен орынды. Әсіресе Абай ескерткішінің алдында және Түйемойнақ аралындағы алаңда, Жеңіс саябағында қаламыздағы түрлі мекемелердің көркемөнерпаздар үйірмелері мүшелерінің ұйытқы болуымен ән мен биден тарту әзірленді. Сондай-ақ жастар ұйымдарының Отан қорғаушылар күні мен Жеңістің 70 жылдығына арналған арнайы флэш-мобтары да ұйымдастырылды.
Қ.ӘЛІМБЕК,
Семей қаласы.
