Семей локомотив пайдалану депосының қызметкерлері аптаның соңғы жұмыс күнін ерекше салтанатты рәсіммен бастады. Олар ғимарат іргесіне осыдан он жыл бұрын қойылған, соғыс жылдарындағы теміржолшылар ерлігінің символына айналған, майдан даласынан оралған тарихи паровоз ескерткішінің алдында Мәңгілік алау жақты. Сондай-ақ соғыс жылдарында еңбек еткен, майданда шейіт болған және қазіргі күні араларында жоқ локомотившілерді еске алды.
{jcomments on}Жиылған көпшілік алдында кіріспе сөз алған Семей локомотив пайдалану депосының басшысы Дәулет Ыдырысов соғыс жылдарында Жеңіс күнін жақындатуға ел локомотившілерінің де зор үлес қосқанын айтып өтті.
— Біздің локомотив депосында майдан даласында шайқасқан 135 қадірменді соғыс ардагері бар еді. Өкінішке орай, бүгінде олардың бірде-біреуі арамызда жоқ. Өткен жылдың күзінде соңғы қарт жауынгерімізді ақтық сапарға шығарып салдық. Ал қазіргі күні сол бір сұрапыл жылдарда тылда еңбек еткен 8 ардагер ғана бар. Олардың барлығын да үйлеріне барып, Жеңістің 70 жылдығымен құттықтап, мекеме атынан марапаттадық. Біз осы бейбіт күнге жеткізген жандар алдында әрдайым тағзым етеміз, — деді өз сөзінде Дәулет Тайтөлеуұлы.
Ал осыдан кейін сөз алған Семей жол бөлімшесі ардагерлер кеңесінің төрағасы, Құрметті теміржолшы Қырықбай Әлсейітов Жеңіс мерекесін атап өтудің бүгінгі өскелең ұрпақ үшін берер тәрбиелік мәніне және оны жақындатуға үлес қосқан теміржолшылар ерлігі мен еңбегіне кеңірек тоқталды.
— Біз екінші дүниежүзілік соғыс, онда қаза бол-ған ардагерлер жайлы неге жиі сөз қозғаймыз? Себебі бұл — кейінгі ұрпақ осы қасіретті жылдарды ұмытпасын, қаруға құштарлық тек қайғы ғана әкелетінін түсінсін, бүгінгі елімізде орнаған бейбіт өмірдің, тыныштық пен тұрақтылықтың қадірін білсін деген ізгі ниеттен туындаған жайт, — деді Қ.Әлсейітұлы. Сондай-ақ қауіп-қатерге бас тігіп, майдан шебінде қызмет жасап, Отан алдындағы борышын адал өтеген машинистер жанқиярлығы жайлы да сөз қозғап өтті.
Осыдан соң салтанатты түрде алау жағу рәсіміне кезек берілді. Бұл құрмет қалыптасқан дәстүр бойынша, мекеме мақтанышына айналған озат локомотивші, 1 класты машинист, депоның аға кезекшісі Анатолий Владимировичке берілді.
Ал соңынан Мәңгілік алауға гүл шоқтары қойылып, майданда қаза болған боздақтар мен ардагерлерді еске алуға бір минут үнсіздік жарияланды.
Қуан ЕРТІС,
Семей қаласы.
