Жеңіс күні қарсаңында облыстық дарынды балаларға арналған мамандандырылған балет мектебінде Жеңіс балы өткізілді. Қалалық ішкі саясат бөлімі мен «Жанұя орталығы» ұйымдастырған шараға Ұлттық гвардияның № 5511 әскери бөлімшесі, «Шығыс» аймақтық әскери қолбасшылығының штабы, № 3 нашар көретін балаларға арналған мектеп-интернат қолдау білдірді. Ардагерлер мен тыл еңбеккерлері мереке қарсаңында балет мектебі тәрбиеленушілерінің өнерін тамашалады.
{jcomments on}«Ардагерлер мен тыл еңбеккерлері соғыс жылдарында қайсарлық, ерлік көрсетіп, табанды еңбек етіп, Жеңіске жетті. Зұлымдық ұғымына тең деп түсінілетін фашизм сияқты құбыжық құбылыстан әлемді азат еткендердің қатарында болды. Біреулері от пен оқтың арасында жүріп — жауға қарсы тайсалмай айқасса, енді біреулері майданға жәрдем беру үшін жан аямай тер төкті. Ардагерлер мен тылда еңбек жасаған ата-апаларымызды қанша мақтан етсек те, артықтығы болмайды. Себебі олар өздерінің ерліктері мен табандылықтарының арқасында бізге, бүгінгі жас ұрпаққа осылай емін-еркін ойнап-күліп, шаттану, би билеп, мерекелік шаралар өткізу мүмкіндігін сыйлады. Жеңіс күні қарсаңында оларға тек қана жақсылық, бақыт тілейміз». Балет мектебінде өткен балға қатысушы өскелең ұрпақ өкілдерінің майдангерлер мен тыл еңбеккерлеріне қарата айтылған лебіздерінің жалпы мәні осындай болды.
Шара барысында балет мектебінің тәрбиеленушілері классикалық би өнерін қаншалықты меңгергендіктерін паш етті. Соның ішінде вальстен бастап балетке дейін билер орындалды. Сондай-ақ жиылған қауым назарына ұлттық мәнердегі хореографиялық қойылымдар ұсынылды. Кештің құрметті қонақтары болған ата-әжелеріміз де қарап қалған жоқ. Балдың өтуіне қолдау көрсетіп келген әскери қызметкерлермен вальс биін биледі. Патриоттық тақырыптағы, соғыс жылдарындағы әндерді айтты.
Балда ардагерлер мен тыл еңбеккерлеріне отансүйгіштік, туған елін мақтан тұту сияқты ұғымдар туралы сауалдар қойылды. Көргендері мен көкейлеріне түйгендері мол қариялар барлық сұрақтарға жан-жақты, терең әрі мәнді жауап беріп, ақыл-кеңестерімен бөлісіп, ризашылықтарын білдірді. Осылайша, ұйымдастырушылар майдангерлер мен тылда тер төккен аға буын өкілдеріне көтеріңкі көңіл-күй сыйлап, алғыстарына бөленді.
Мирас ҚҰСАЙЫН,
«Семей таңы»
