Жеңісті ұлықтау, ардагерлерді құрметтеу — бір мезеттік шара емес, жылдан-жылға жалғасатын құрмет. Бұл іс-шаралардың мақсаты да ауқымды — Жеңісті ұлықтау арқылы тарихи сананы жаңғыртып, ұрпақтан-ұрпаққа жеңімпаз халықтың рухын жалғау.
{jcomments on}Жеңіс күні қарсаңында «Шығыс Қазақстан аймақтық энергетикалық компаниясы» АҚ ұжымы соғыс және тыл ардагерлеріне арналған мерекелік кеш өткізді. Дәстүрлі шарада кеудесі ордендер мен медальдарға толы ардагерлер мен тыл еңбеккерлеріне мерекелік медальдар табысталды. Кейін күмбірлеген күйді, әуелеген әнді тыңдап, сонау сұрапыл соғыс жылдарында қалған жастық шақтарын аңсап, көңілдері толқыған ардагер аталар мен әжелерді ұжым өнерпаздары құттықтады.
Халқымыздың бейбітшілігі жолында жаумен шайқасқан, елге Жеңіспен оралған соғыс және тыл ардагерлерін Жеңістің 70 жылдығымен ұжым басшылығы да құттықтап, ізгі тілектерін білдірді. Жалпы «ШҚ АЭК» АҚ-да жұмыс жасап жатқанына отыз жылға жуықтаған «Энергетик» атты ардагерлер ұйымы бар. Аталмыш ұйымды тыл еңбеккері Татьяна Федорченко басқарып келеді. Оның айтуынша, ұйымда бүгінде екі жүзден астам ардагер энергетик, оның ішінде екі соғыс ардагері және 47 тыл еңбеккері бар. Бүгінгі шарада сол соғыс ардагерлері мен тыл еңбеккерлеріне айрықша ықылас көрсетілгенін айтты ардагерлер ұйымының төрайымы.
— Ардагерлер ұйымы қарттар мен энергетиктер күні, Жеңіс күні болсын — барлық мерекелерді ерекше ықыласпен атап өтеді. Әрине, бүгінгі іс-шарамызға келе алмаған ардагерлеріміз де бар. Дегенмен біз оларды үйлеріне барып құттықтап қайттық. Шараның мән-маңызы ерекше. Әсіресе жастарға патриоттық тәрбие беруде маңызды болып отыр. Сондықтан да кейінгі ұрпақ батыр бабаларының ерліктерін ешқашан ұмытпай, әрдайым ұлықтап жүргендері абзал, — деді ардагерлер ұйымының төрайымы.
Мерекелік кеш «ШҚ АЭК» АҚ ұжымы дайындаған концертпен жалғасты. Бұдан кейін ардагерлер қаламыздағы Мәңгілік алауға гүл шоқтарын қойып, ұжым әзірлеген ақ дастарқаннан дәм татып, ризашылықпен тарқасты.
Асан МЫРЗАХАНОВ,
«Семей таңы»
