8 мамыр, жұма күні Абай атындағы қазақ музыкалық—драма театрында Жеңістің 70 жылдық мерекесіне арналып салтанатты жиын өтті. Оған Семей қаласының әкімі Айбек Кәрімов бастаған әкімдік қызметкерлері, соғыс ардагерлері, тыл еңбеккерлері, қала тұрғындары, «Шығыс» өңірлік әскери қолбасшылығының өкілдері қатысты.
{jcomments on}Сахнаның безендірілуі, қарт майдангерлер мен тыл еңбеккерлерінің, жиынға қатысуға келгендердің көңіл-күйі Жеңіс мерекесінің қаншалықты мәні бар екенін айғақтап тұрды. Қарша бораған оқтың арасында дұшпанмен тайсалмай айқасқан жауынгерлердің ерлігі ешқашан ұмытылмақ емес. Залға жиналған қауым, шара басталмай тұрып, жас ұрпақ өкілдері қолдарына ұстаған о дүниелік болған соғысқа қатысқан сарбаздардың суреттерін көрді. Бірі ұрыс даласында оққа ұшқан, енді бірі бейбіт заманда өмірден озған майдангерлердің бейнелерінен сұм соғыстың жекелеген адамдарға, сонымен бірге жалпы халыққа қаншама қасірет әкелгенін білуге болатындай. Осылайша бүгінгі өскелең жастар кешегі батырлардың рухына тағзым жасады.
Салтанатты шара барысында ардагерлер мен тыл еңбеккерлерін, көрермендерді «Шығыс» өңірлік әскери қолбасшылығы басшысының тәрбие және әлеуметтік-құқықтық жұмыстар жөніндегі орынбасары Азамат Мұқатаев құттықтады. Жеңіс күні аталарымыз бен аналарымыздың рухын бүкіл әлемге танытқан қастерлі мереке екенін атап өтті. Жас ұрпақтың ардагерлер мен тыл еңбеккерлеріне, майданда қаза тапқан боздақтарға қарыздар екенін тілге тиек етті. Жеңіске жеткен буын өкілдеріне құрмет көрсету қажеттігін айтты.
— Бүгінгі бейбіт өмір сүруіміз майдангерлер мен тыл еңбеккерлерінің танытқан қайсарлығы, ерлігі мен еңбеккерлерінің арқасы. Отты жылдар қасіреті мен аталарымыздың батырлығы ешқашан ұмытылмауға тиіс. Біз соғыста жауға қарсы тайсалмай шайқасқан жауынгерлерді мақтан етеміз. Қазіргі таңда ардагерлер белсенді жұмыс істеуде. Патриоттық тәрбие ісіне атсалысуда. Барлықтарыңызды мерекемен құттықтай келе, бақыт, шаттық тілеймін. Отанымыз Қазақстан Республикасының өркендей беруі үшін, жемісті еңбек етулеріңізге тілектестік білдіремін, — деді Азамат Мұқатаев.
Сондай-ақ салтанатты жиын барысында үш ардагерге «Семей қаласының Құрметті азаматы» атағы берілді. Олар Венгрия, Румыния, Чехия, Югославия мен Болгарияны азат етуге қатысқан Тұяқбай Алпысов, Балтық әскери-теңіз флотында ерлік танытып, Ленинградты азат етуге қатысқан Қамкетай Байыров, 1942 жылдан соғыс аяқталғанға дейін Украин майданында соғысып, батылдығымен танылған Надежда Горбачева. Аттары аталған ардагерлердің үшеуі де еліміздің өркендеуіне, жастарға патриоттық тәрбие беруге елеулі үлес қосып келеді.
Салтанатты шара ардагерлер мен тыл еңбеккерлерінің құрметіне қаламыздың өнер ұжымдары әзірлеген патриоттық тақырыптағы әндер мен мазмұнды көріністерден тұратын концерттік бағдарламаға ұласты.
Мирас САМАЛБЕКҰЛЫ,
«Семей таңы»
