Семей қаласы дене шынықтыру және спорт бөлімінің ұйымдастыруымен қалада екі айдан бері өндіріс орындары мен мемлекеттік мекемелер арасында спартакиада өткізілді. Мамырдың он екісі күні аталмыш ауқымды спорттық сайыс аясында шахматтан ұйымдастырылған жарыстың қорытындысы шығарылды.
{jcomments on}Ұйымдастырушылардың сөзінше, бұл спартакиада бірінші рет өткізіліп отырған көрінеді. Былайша айтқанда, игі дәстүр қайта жаң-ғыртылған. Семей қаласы дене шынықтыру және спорт бөлімінің басшысы Мұрат Құржықаев жарысқа қатысуға жергілікті кәсіпорындар мен мемлекеттік мекемелер ұжымдары үлкен қызығушылық танытқанын атап өтті.
— Олардың ішінде «Машина құрастыру зауыты», «Цемент зауыты», «Жылукоммунэнерго», ШҚ АЭК, «Силикат» акционерлік қоғамы сияқты он екі өндіріс ошағы бар. Жалпы, спартакиада спорттың бес түрі бойынша өткізілді. Атап айтқанда, волейбол, футбол, баскетбол, үстел теннисі, бүгін, міне, шахматтан жарыс болып жатыр. Жеңіске жеткендер мен жүлдегерлер арнайы грамоталар мен сыйлықтарды иеленеді. Әрі облыстық, республикалық жарыстарға жергілікті құраманың сапында қатысуға мүмкіндік алады,- деді Семей қаласы дене шынықтыру және спорт бөлімінің басшысы. Сондай-ақ Мұрат Құржықаев алдағы уақытта спартакиаданың бағдарламасын кеңейтіп, ұлттық ойындар мен қысқы спорт түрлерінен де жарыстар өткізу көзделіп отырғанын да атап өтті. Сайысты ұйымдастырудағы мақсат – халық арасында, оның ішінде өндіріс ошақтары жұмысшылары мен мемлекеттік мекемелер қызметкерлері арасында салауатты өмір салтын насихаттау.
Жалпы, спартакиадаға алты жүзге тарта адам қатысқан. Олардың ішінде елуден астамы шахмат ойынынан шеберліктерін сынға салды. Бұл спорт түрі бойынша он бір команда бәсекеге түскен. Жарыс шарты бойынша қатысушы ұжымдар бастапқыда екі шағын топқа бөлініп, өзара мықтыны анықтаған. Осы екі топтың ішінен озып шыққандар финалда жүлделі орындар үшін ойнады. Озық шыққан командалар арнайы сыйлықтармен, грамоталармен марапатталды. Жеңімпаздар қала құрамасы сапында облыстық, республикалық жарыстарға қатысуға жолдама алды.
Мирас ҚҰСАЙЫН,
«Семей таңы»
