Республиканың барлық аймағында сәуір айының 16 жұлдызынан бастап «Нұр Отан» партиясының «STOP-қылмыс» жобасы аясында «Қауіпсіз аула» республикалық ак-циясы өткізілуде.
Ағымдағы жылдың мамыр айының 15 күні партияның Семей қалалық филиалының ұйымдастыруымен қоғамдық тәртіпті сақтау, азаматтардың қауіпсіздігін қамтамасыз ету және қылмыстың алдын алу мақсатында «Қауіпсіз аула» республикалық акциясы өткізілді. Шараға партия белсенділері, қалалық әкімдік өкілдері, Семей қалалық ішкі істер басқармасының қызметкерлері, мемлекеттік емес ұйымдар мен жастар ұйымдарының, БАҚ өкілдері қатысып, көп қабатты тұрғын үй аулаларында рейд өткізді.
{jcomments on}Акция аясында арнайы топтар қаламыздың шағын аудандарында тұрғын үй аулаларындағы балалар ойнайтын алаңдардың жай-күйі, тұрғын үй маңындағы электр трансформаторының қоршалғандығы, балалар алаңы маңындағы жолда жылдамдықты тежеуді ескертетін жол белгілерінің бар жоқтығы, тұрғындардың учаскелік полицейлердің жұмыстарына деген көзқарастары, аулалардағы қоқыс жәшіктерінің жеткіліктігі мәселелерін қарады.
Атап айтар болсақ, бұл күні қаланың Шәкәрім даңғылы, Пушкин, Первомай, Глинка сияқты бірқатар көшелерінде орналасқан пәтер иелері коопертивіне қарасты көп қабатты үйлердің аулалары тексерілді.
Тұрғындармен кездесу барысында анықталған қала тұрғындарын мазалайтын басты мәселелердің бірі, көлік жүргізушілерінің темір тұлпарларын тұрғын үй ауласына кіргізіп қою болды. Мұндай жайттар коммуналдық қызметке кедергі болумен қатар, жедел жәрдем шақырғанда, апатты жағдайлар орын алғанда және тұрғындардың еркін жүріп-тұруына кедергі келтіретіні жөнінде айтылды.
Сондай-ақ тұрғындар тарапынан балалар ойыны алаңдарының қоршаусыз болуы, аулаларды санитарлық жағдайда ұстау, аула ішін жарықтандыру, көгалдандыру сияқты мәселелер көтерілді.
Шараның қорытындысы бойынша тұрғындар тарапынан келіп түскен ұсыныстардың барлығы қабылданып, алдағы уақытта құзырлы мемлекеттік мекемелерге арнайы хаттар жолданатын болады.
Аулаларды абаттандыру қаланың сыртқы келбетіне де көрік беріп, тұрғындардың өмір сүру сапасын арттыратыны анық. Сондықтан да тұрғындардың құқықтық сана-сезімін, азаматтық жауапкершілігінің деңгейін арттыру бағытындағы осындай іс-шаралар алдағы уақытта да өз жалғасын табады.
Дархан ЖҰМАДІЛОВ,
«Нұр Отан» партиясы
Семей қалалық филиалының
қоғамдық қабылдау бөлімінің меңгерушісі.
