25-ші мамырда жылдағы дәстүр бойынша еліміздің барлық мектептерінде соңғы қоңарау соғылады. Бұл мереке- мектеп бітіруші түлектер үшін ғана емес, ата-аналарға, жалпы жұртшылыққа әдемі әсер сыйлайтын сәт.
Семей шаһарында да соңғы қоңырау мерекесі жарасымды әнімен, салтанатты сәнімен өз мәнінде өрнек тапты. Осындай салтанатты шараның бірі Семейдегі № 39 жалпы білім беретін орта мектепте өткізілді.
{jcomments on}Биыл аталмыш мектептен 50 жас түлек үлкен өмірге қадам басқалы тұр. 1 оқушы «Алтын белгіден» 5 оқушы «Үздік аттестаттан» үміткер. Салтанатты шарада мектеп директорының оқу-тәрбие ісі жөніндегі орынбасары Айжан Сепсекенова ұстаздар мен оқушыларды құттықтап, мектеп бітіруші түлектерге сәт-сапар тілеп, өзіндік тілегін арнады. Сондай-ақ шығармашылық жетістіктері, егеменді Отанымыздың болашақ буынын тәрбиелеу ісіне, білім беру саласына қосқан қомақты үлесі үшін ұстаздарды қалалық білім бөлімінің басшысы Н. Фесенконың грамоталарымен марапаттады.
— Құрметті оқушылар, ұстаздар, ата-аналар. Сіздерді бүгінгі соңғы қоңырау салтанатты мерекесімен құттықтаймын. Мектеп бітіруші түлектер, алтын ұя мектептеріңмен қоштасып, өмірдің келесі белесіне жолдама алғалы тұрсыңдар. Осы жолда қадамдарыңа сәттілік тілеймін. Ұлттық бірыңғай тестілеу сын сағатынан сүрінбей өтіп, армандаған мамандықтарыңның иесі болуларыңа тілектеспін. Үлкен өмірге аттаған қадамдарыңа нұр жаусын. Талаптарың оң болсын, жаңа өмірлеріңізге ақ жол, сәт сапар тілейміз, — деді Айжан Задақызы.
Салтанатты сәтке Семей қаласының Шәкәрім атындағы университетінің техника ғылымдарының докторы, профессор Дәлел Жайлаубаев арнайы қатысып, айтулы жиынның куәсі болды. Мектеп бітіруші түлектер де мектепке, ұстаздарға деген ризашылықтарын жеткізді.
Мектеп бітіріп, үлкен өмірге қадам басқалы тұрған түлектердің бірі — Назерке Жақан. Ол мектеп қабырғасында «Алтын белгіге» үміткер жалғыз оқушы. Болашақта заңгер мамандығын таңдағысы келеді. Назерке алдағы уақытта әділдік үшін күресіп, еліміздің дамуына өз үлесін қосуға ниетті. Бүгінгі естен кетпес сәтті ешқашан ұмытпайтынын айтқан ол барлық мектеп қабырғасынан түлеп ұшқан өрендерге өз тілегін білдірді.
— 11 жыл оқыған сүйікті мектебімізді бітіргелі тұрмыз. Жас түлектердің барлығына тек сәттілік тілеймін. Алдағы ҰБТ-ны ойдағыдай тапсырып, барлығының жоғарғы оқу орнына түсуіне тілектеспін. Өзім мектебімнің намысын қорғап, «Алтын белгімді» алып шығамын деп ойлаймын. Барлығына бақыт тілеймін. Тек жақсылық болып, армандарымыз орандалсын, — деді ақ жарма тілегін білдірген Назерке Жақан.
Жиын соңында соңғы рет қоңырау соғылып, шәкірттер алтын ұя мектептерімен қоштасты. Сондай-ақ өзге де мектептерге қала әкімдігінің өкілдері барып, мерекелік шараға ортақтасты.
Жалпы, биылғы жылы Семейде 1723 оқушы мектеп қабырғасынан үлкен өмірге аяқ басып отыр. Әзірге 1217 түлек, яғни 70,6% бітіруші, ҰБТ емтиханынан өтуге ынта білдірген. Салыстырмалы түрде айтар болсақ, өткен жылы мектепті 1925 түлек бітіріп, 1375-і, 71 пайызы, ҰБТ тапсырған еді. Сондай-ақ орташа балл 78-ді құраған болатын. Ағымдағы жылы “Алтын белгіге” 30 үміткер иек артуда. Өткен жылы оған 35 түлек талап қылып, тек 19-ы ғана үмітті ақтаған болатын. Үздік аттестат иеленуге биыл 29 оқушы ниет қылып отыр. Былтырғы жылы 18 түлек үміттеніп, тек 8-і ғана көзделген межеден табылып, қол жеткізе алған еді. Асан МЫРЗАХАНОВ, «Семей таңы»
