Семейдің сәулетті келбетін қалыптастыруда жасалып жатқан жұмыстар аз емес. Алайда қала келбетіне көлеңке түсірер жайттар да кездесіп жататыны бар. Біздің айтпағымыз — тұрғындар жүретін басты көшелерде жабайы саудамен айналысушылар. Өздеріңізге белгілі, Семейдегі ірі сауда орталықтарының айналасында бейберекет сауда жасап отырғандардың қарасы көп. Осыған орай сәрсенбі күні ретсіз сауда жасаушыларға кезекті түсіндіру жұмыстары жүргізілді. Айтулы шараға құқық қорғау органдары, санитарлық қызмет, қалалық кәсіпкерлік бөлімі және салық басқармасы мамандары қатысты.
{jcomments on}Семейде ретсіз сауда қызған орындардың бірі — Әуезов даңғылының бойы, Жаңа құрылыс (Новостройка) ықшам ауданы маңы. Бұл жерде саудагерлер тіпті жаяу жүргіншілерге арналған жолды басып алып, күнкөрістің қамына айналдырған. Дегенмен құзырлы орган көшедегі бейберекет сауданы жою және тәртіпке келтіру жөнінде мақсатты және жүйелі жұмыс жүргізуді бастап кетті. Бекітілген іс-шаралар жоспарына сәйкес, Семей қаласының ІІБ, кәсіпкерлік бөлімінің, салық басқармасының қызметкерлері күн сайын рейдтер жүргізбек.
— Қазіргі таңда Әуезов даңғылы бойында орналас-қан «Южный» дүкенінің алдындағы белгіленбеген орында сауда жасау бойынша жұмыстар жүргізілуде. Осындай жолмен сауда жасаушылар ҚР Әкімшілік құқық бұзу кодексінің 204-бабы бойынша әкімшілік жауапқа тартылуда. Оларға бастапқыда 5 АЕК көлемінде айыппұл салынды, — дейді Семей қаласы ІІБ әкімшілік полиция бөлімінің табиғатты қорғау бөлімшесінің инспекторы, полиция капитаны Мейірғазы Масалимов.
Оның айтуынша, бұған дейін жергілікті учаскелік полиция инспекторлары бұл жерлерде түсіндіру жұмыстарын жүргізген. Заң бұзғандарға әкімшілік хаттамалар толтырылып, айыппұл да салыныпты.
— Қазіргі уақытта көріп тұрғандарыңыздай, барлығы жаяу жүргіншілер жүретін жерлерде сауда жасауда. Атап өткенімдей, бұған дейін барлық сауда жасаушыларға әкімшілік хаттамалар толтырылған. Дегенмен айыппұлдарын төлеп, қайта саудаларын жасап жатыр. Енді қайталанған әрекеттері үшін бұл кісілерге әкімшілік кодекс бойынша 10 АЕК көлемінде айыппұл салынады, — дейді табиғатты қорғау бөлімшесінің инспекторы.
Әрине, жолдың бойы сатушы үшін ыңғайлы. Өйткені олар орындары мен салық үшін ешқандай ақы төлемейді. Айта кетуіміз керек, бұл жабайы сауда жасалатын шаһардағы жалғыз орын емес. Мұндай келеңсіздік қаладағы Чехов және Аймауытов көшелерінің бойларында да кездеседі. Сондықтан да арнайы топ алдағы уақыттарда бұл жұмыстарды, тәртіп орнамайынша, жалғастыра бермек.
Асан МЫРЗАХАНОВ, «Семей таңы»
