31 мамыр – Саяси қуғын – сүргін құрбандарын еске алу күні Семей қаласында да жоғары деңгейде аталып өтілді. Қазақтың қайсар ұлы Қайым Мұхамедханұлы ескерткішінің алдында зұлмат жылдары ұлты үшін қасірет шеккендерді еске алды. Жиынға Семей қаласы әкімінің орынбасары Надежда Шарова, Семей қаласы әкімі аппаратының басшысы Зәуреш Исабаева, саяси қуғын көргендердің ұрпақтары, зиялы қауым өкілдері мен студент жастар қатысты.
{jcomments on}Жиында қала әкімінің орынбасары Надежда Шарова Семей қаласы репрессия жылдары ең көп жапа шекен өңірлердің бірі екенін атап өтіп, өткен тарихтың ақтаңдақ беттерінен сабақ алып, бір шаңырақтың астына көп ұлттарды топтастырған ортақ мемлекеттің гүлденуіне барша азаматтарды бір кісідей атсалысуға шақырды.
— Құрметті жерлестер, өткен ғасырдың 20-шы жылдары еліміз басынан ауыр кезеңдерді өткерді. Жаппай жазалау шаралары ел тарихындағы ең ауыр уақыттардың бірі екені анық. Әрбір қазақстандық шаңырақ азапты күндерді басынан кешті. Бүгінгі таңда біздің міндетіміз сол қиын-қыстау кезеңде мемлекет мүддесін қасық қаны қалғанша аянбай қорғаған боздақтардың рухына тағзым етіп, олардың ерлігін ұмытпау. Нәубет жылдары Семей өңірі ең көп зардап шеккен аймақтардың бірі болды. Өткенді бағаламай, болашаққа зер салу қиынға соғады. Біздің мақсатымыз — ортақ шаңырағымыз Қазақстанның бүгінгі тарихына өзіндік үлес қосу, «Мәңгілік Ел» идеясын іске асыруда барлығымыз жұмыла жүк көтеруіміз қажет, — деп атап өтті қала әкімінің орынбасары.
Семей қалалық ардагерлер кеңесінің төрағасы Амантай Доғалақовтың айтуынша, 1937 жылдың 2 желтоқсанында Семейде жүздеген адам жазықсыз атылған. Солардың ішінде Алаш интеллигенциясының белді мүшесі Мұхамедхан Сейітқұлов та болған. Көзі тірісінде Мұхтар Әуезов, Жүсіпбек Аймауытов, Міржақып Дулатов және тағы да басқа ұлт марқасқаларымен тығыз байланыста болған көрінеді. Алайда күні бүгінге дейін боздақтың жерленген жері беймәлім қалуда. Сонымен қатар Амантай Айтмұрзаұлы жиналғандар алдында Қайым Мұхамедханов жайында өз ойымен бөлісті.
— Тектінің тұяғы, асылдың сынығы Қайым Мұхамедхан-ұлы да талай тар жол, тайғақ кешкен. Өміріндегі қиыншылықтарға қарамастан, ғалым шығармашылықтан бір сәтке де қол үзбеді. Бүгінде ұрпағы тұшынып оқитын құнды дүниелері ғалымның атақ – абыройын асқақтатып тұр. Шаһардағы Абайдың мемлекеттік қорық — мұражайының қалыптасуына негіз болған бірден — бір тұлға да Қайым Мұхамедханұлы,- деп атап өтті жиналғандар алдында Амантай Доғалақов.
Сондай-ақ шара барысында қалалық мәдениет сарайының «Халықтық ақындар орталығының» жас ақындары Алаш арыстарына, ұлт зиялыларына өз арнауларын оқып, жиын соңы ескерткішке гүш шоқтарын қою рәсімімен түйінделді.
Жақсылық МҰРАТҚАЛИ, «Семей таңы»
