Аптаның алғашқы жұмыс күні Семей қаласының әкімі Ермак Сәлімов қаладағы бірқатар әлеуметтік нысандарда болып, жұмыс барысымен танысты. Атап айтсақ, денсаулық сақтау мекемелері, жылу қазандықтары мен жеке кәсіпкерлердің өндіріс орындарын аралады.
Семей қаласының әкімі Ермак Сәлімов алдымен Жедел медициналық жәрдем ауруханасымен танысты. Жаңа медициналық мекеменің жұмысымен таныстыр-ған мекеме басшысы Қайноллан Мусин нысанда орын алып отырған бірқатар кемшіліктерден құлағдар етті. Оның айтуынша, іргелі мекеме бүгінде орталықтандырылған су жүйесінен ажыратылған. Есесіне өздерінің ұңғымаларынан (скважина) тіршілік көзін пайдаланып отыр. Бұл — су желісін дұрыс жүргізбеген мердігер мекеменің салғырттығы. Бұдан өзге құрылысшылар сапасыз жұмыстары үшін ғимарат ішін толықтай қайтара әрлеп те шығыпты. Нысанда электр жарығы да мәселе тудырып отырған көрінеді. Мамандардың айтуынша, электр жарығын жеткізетін қос кабельге түсетін салмақ талапқа сай. Алайда жарықтың неліктен сөніп қалатынын не мердігер, не «Шығыс Қазақстан аймақтық энергетикалық компаниясы» АҚ мамандары анықтай алмай отыр. Бұл ретте мекеме басшысы алдағы уақытта мердігер мекеме мен энергетиктер мәселенің мән-жайын бірлесе анықтайтынын атап өтті. Бүгінде осы мақсатта арнайы жұмыс тобы құрылыпты.
{jcomments on}Айта кетуіміз керек, аймақ басшысы Даниал Ахметов атылмыш нысанда бұған дейін де бірнеше мәрте болып, бірқатар ескертулер жасаған. Олқылықтардың орнын толтыруды да қатаң тапсырған болатын. Солардың бірі — ғимаратқа жаңа жылу жүйесін тұрғызу мәселесі. Бүгінде мекеме электр қуатымен жылытылады. Ал бұл бюджет қаражатына қомақты шығын алып келіп отыр. Мәселен, қыстың қақаған қатты аязында айына 70 млн. теңге қаражат жұмсалады екен. Сондықтан алдағы уақытта қатты отынмен жылытатын жеке қазандық салу көзделуде. Бүгінде ол үшін арнайы жер телімі қарастырылып отыр.
Осыдан соң қала әкімі Ермак Бидахметұлы өткен жылы ғана пайдалануға берілген туберкулезге қарсы балалар ауруханасының жұмысымен танысты. Аурухана құрылысы Сауд Арабиясы корольдігі мен Шығыс Қазақстан облысы әкімдігі арасындағы меморандум аясында жүргізілді. Бүгінде медициналық мекеме, ем жүргізумен қатар, білім берудің заманауи жабдықтарымен жарақталған. Ал сексен орындық ауруханада Шығыс Қазақстан облысының барлық аумағынан келген балалар мен жасөспірімдерге амбулаториялық — емханалық, стационарлық нысанда жоғары білікті көмек көрсетіледі. Жаңа аурухана Италия мен Ресейде шыққан аппараттармен жабдықталған. Емдеуге қолайлы жағдай жасалған, сонымен бірге балаларды оқыту үрдісі қолға алынған. Мектеп мультимедиялық кабинетпен жабдықталған. Бұған қоса компьютерлер, интерактивті тақта, кітапхана да бар.
Мекеменің бас дәрігері Насира Жақсылықованың айтуынша, ауруханада бір ғана мәселе орын алып отыр. Ол — ғимаратқа тікелей қатынайтын жолдың жоқтығы. Алдағы уақытта екі шақырым жол жөнделсе, емделушілердің қатынауына қолайлы жағдай қалыптасар еді.
Ермак Сәлімов құрылысы жүріп жатқан Жедел медициналық көмек көрсету станциясына да арнайы барды. Мұнда қазір құрылыс жұмыстары аяқталуға жақын. Медициналық жедел жәрдем станциясының жаңа ғимаратында әр бригадаға арналған бөлмелер, көліктерге арналған орындар мен диспетчерлік қызмет орталығы болады. Сонымен қатар мекемеде орталықтандырылған жылу және су жүйесі де қарастырылған. Семей қаласы медициналық жедел жәрдем станциясының директоры Николай Мантлер де нысанға қатынайтын жолдың жөнделуі қажеттігін атап өтті. Сондай-ақ мекемеге апаратын жолда жер асты суларының мәселесі де барын жеткізді.
Осыдан кейін қала әкімі Энергетик кентіндегі «№5 интернат жылу қазандығы» жұмысымен танысты. «Теплокоммунэнерго» МКК техникалық директоры Асхат Букатов атап өткендей, жылу қазандығында ағымдағы жөндеу жұмыстары жүргізілуде. Барлық қазандық пен жылу желілері алдағы маусымға толықтай дайын. Қазандықтағы жылу қуаты да жеткілікті. Өткен жылы жаңадан жеті тұрғын үй аталмыш қазандыққа қосылған. Сапар барысында қала әкімі кредиторлық қарыздың көлемін де сұрап, бұл бағытта жұмыстарды осы бастан жандандыруды тапсырды. Айта кетейік, бүгінде қала тұрғындарының жылуға берешегі 600 млн. теңге көлемінде. Бұдан өзге бюджеттік ұйымдар берешектері бар.
Жұмыс күні қала әкімі сондай-ақ Энергетик кентіндегі «Солтүстік» көлік-логистикалық орталығының жұмысымен және қоқыс өңдеумен айналысатын «Спецтранс Семей» ЖШС-не ат басын тіреді. Соңғы мекеме құрылыс материалдары мен тұрмыс қалдықтарын өңдеумен айналысса, «Солтүстік» көлік-логистикалық орталығында құрылыс жұмыстарының бірінші кезеңі аяқталған. Алдағы уақытта жер мәселесі шешілсе, орталық құрылысының келесі кезеңдерін бастауды жоспарлап отыр.
Шаһар басшысы жұмыс сапарын Қаржаубайұлы көшесі, 249/1 мекенжайында бой көтерген «Родина» сауда үйін аралаумен тәмамдады. Бүгінде азық-түлік бағасын тұрақтандыруға үлесін қосып отырған сауда орнына кез келген шаруа келіп өз өнімін ұсынуына болады. Оның үстіне саудагерлерге барлық жағдай жасалған. Алғаш болып аудандарға қарасты сауда үйін Бородулиха ауданы шаруа қожалығының иесі Александр Майер өткен жылы ашқан болатын. Қала басшысы Ермак Сәлімов осындай орталықтардың қала тұрғындары үшін маңызды екенін, ең бастысы, бағаны тұрақтандыру үшін шаруалар мен тұтынушыларға тікелей байланыс жасалғанын құптады.
Асан МЫРЗАХАНОВ, «Семей таңы»
