Қаладағы Би Боранбай, Дулатов, Фрунзе, Уәлиханов, Гагарин сияқты бірқатар көшелер мен Әуезов даңғылының жекелеген аумағына ағымдағы жөндеу жұмыстары жүргізілмек. Жөндеу жұмыстарына облыстық бюджеттен 62 млн. теңге қаржы бөлінген екен. Сейсенбі күні қала әкімі Ермак Сәлімов жөндеу жұмыстары жүргізіліп жатқан көшелерге барып, ондағы жұмыс барысымен танысты.
{jcomments on}Қала басшысы алдымен Би Боранбай көшесіне аялдады. Ұзындығы 800 метрді құрайтын аталмыш көше жолының жөндеу жұмыстары «Семей жолдары» ЖШС-нің құзырында екен. Мұнда 15 бірлік техникасы мен 17 жұмысшы жұмылдырылған. Мердігер мекеме ағымдағы жөндеу жұмыстарын 15 күн ішінде аяқтауды жоспарлап отырған көрінеді. Одан кейін Ермак Бидахметұлы Терешкова көшесінде болып, жүргізіліп жат-қан жұмыстарды көрді. Бұл көшенің жөндеу жұмыстары «Гордорстрой» ЖШС-не жүктелген. Қала басшысына жұмыстары жайлы баяндаған мамандар мұндағы 875 метр ұзындықтағы жолдың үстіне 15 бірлік техникасы және 25 адамның жұмыс күшімен 700 тонна асфальт төселетінін жеткізді. Ал жөнделетін жолға кепілдеме берілгендіктен аталмыш мердігер компания 2 жыл бойы техникалық қызметін ұсынады екен. Жөндеу жұмыстарымен танысу барысында қала әкімі Ермак Сәлімов жөнделіп жатқан жолдардың сапасы қалалық мәслихат депутаттарының қадағалауымен ғана шектелмеуі керектігін айтып өтті.
— «Біткен іске сыншы көп» демекші, жөндеу жұмыстары аяқталған соң, жолдың сапасы туралы түрлі пікірлерін білдіріп, сын айтатын азаматтардың болатыны белгілі. Сондықтан тұрғындар да жүргізіліп жатқан жұмыстарды өз бақылауларында ұстаулары керек. Алайда қандай да бір олқылықтарды байқаса, айтар уәждері болса, оларға тиісті орындарға дер кезінде хабарласуларын сұраймыз, — дей келе, — облыс басшысы Семей қаласының қазынасына 500 млн. теңге көлеміндегі қаржыны қайтарып берген болатын. Оның 62 млн. теңгесі жолдардың ағымдағы жөндеу жұмыстарына жұмсалуда. Сонымен қатар облыстық бюджеттен қосымша 420 млн. теңге қаржы бөлінбек. Оның 219 млн. теңгесі жолдардың жөнделуіне жұмсалады деп жоспарлануда. Бұл бірінші кезең болмақ,- деп атап өтті Ермак Бидахметұлы.
Айта кету керек, биыл ұзындығы отыз шақырымнан астам жолды ағымдағы жөндеу жұмыстарына 100 млн. теңге қаржы бөлінген екен.
Жақсылық МҰРАТҚАЛИ, «Семей таңы»
