Семейдегі Невзоровтар отбасы атындағы бейнелеу өнері мұражайында Астана күні мерекесі қарсаңында Шығыс Қазақстан өңіріне танымал суретші Леонид Агейкиннің «Алтай сыры» атты көрмесі ашылып, алдағы бір ай көлемінде семейлік көрерменнің көзайымына айналады.
Көрме Шығыс Қазақстан өнер мұражайы мен Невзоровтар отбасы атындағы бейнелеу өнері мұражайының қолдауымен ұйымдастырылды. Көпшіліктің назарына суретшінің отызға жуық туындысы ұсынылды. Мұражай директоры Татьяна Стромскаяның айтуынша, Леонид Агейкиннің туындыларынан ешкімге ұқсамайтын құбылысты аңғаруға болады.
— Оның сурет салу техникасы өзгеше, өнертанудағы түсінігі өзгеше. Суретшінің графикалық жұмыстарынан қарындаштың қағаз бетіне жеңіл түскені анық көрінеді. Кескіндемелік туындыларынан да қылқаламды жақсы меңгергенін байқаймыз. Көрмеге келушілер Леонид Агейкин шығармаларын мұқият зер сала қараса, сурет өнерінің құдіретіне қаныға түседі, — дейді Татьяна Александровна.
{jcomments on}Сондай –ақ облысаралық ықпалдастық бағдарламасы аясында Невзоровтар отбасы атындағы бейнелеу өнері мұражайында павлодарлық суретшілер Қабдыл-Ғалым Қаржасов пен Валерий Приходьконың туындылары қойылған тағы бір көрмені семейліктердің тамашалауына мүмкіндік бар. Көрме Қазақстан халқы Ассамблеясының 20 жылдық мерейтойына орайластырылған.
— Өткен жылы да Семей қаласына арнайы келіп көрме ұйымдастырған едік. Осыдан кейін Невзоровтар отбасы атындағы бейнелеу өнері мұражайының директоры Татьяна Стромская Павлодарға келіп, шеберханамызбен танысты. Сол кезде әріптесім Валерий Приходько екеуімізге Семейде тағы да көрме ұйымдастыруымызды ұсынды. Әрине, бірден келістік. Өзім ауылды жерден шыққаннан кейін, маған осы тақырып жақын. Кең дала, қазақ батырлары, салт-дәстүр, жалпы ауыл өмірі осы көрмеде бейнеленген. Сонымен қатар ата — ана, ана мен бала, әке мен бала, өнер адамдары жайлы сыр шерттім, — дейді Қабдыл–Ғалым Қаржасов.
Павлодарлық қылқалам шеберлерінің көне дәстүрлер мен жаңа көркемсурет талаптарын жетік игеруі, дербес шығармашылық қолтаңбалары, әрине, туған жерге деген нәзік сезімдері ұрпақтар сабақтастығының жалғасын тауып келе жатқандығын дәлелдей түседі. Кереку суретшілері көрмесінің ашылу салтанатында алғаш болып Невзоровтар отбасы атындағы бейнелеу өнері мұражайының директоры Татьяна Стромская құттықтады.
— Қазір сурет өнерінің бағыты, стилі және технологиясы көп өзгеріске ұшырады. Алайда тек бір нәрсе ғана өзгеріссіз қалды. Бұл — суретшінің жан дүниесімен шығарған туындысын кейінгі ұрпаққа қалдыруы. Сондықтан да сурет өнері ешқашан да жоғалмақ емес. Бұл мәңгілік мұрамызды ешқандай технология алмастыра алмайды. Өйткені бұл өнер арқылы барша әлемді суреттеп беруге болады. Міне, осындай дарынды суретшілер Семей қаласына келіп отыр. Қонақтарымызға тағы да көптен-көп алғысымды білдіргім келеді, — дейді Татьяна Александровна.
Көрмені тамсана тамашалаған семейліктер де өз пікірлерін білдіріп, ақ тілектерін жеткізді. Сондай-ақ керекулік қонақтарды Семей қаласының Шәкәрім атындағы мемлекеттік университетінің бейнелеу өнері және дизайн кафедрасының профессоры Нұрбұлан Өтепбаев пен Семей қаласы суретшілер одағының төрағасы Сайлаухан Алшынбай-ұлы суретшілерге алғысын білдіріп, шығармашылық табыстар тіледі.
А. САМАТҰЛЫ, Ж. СҮЛЕЙМЕН, «Семей таңы»
