Семей қаласының орталық алаңында Қазақстан Республикасы Ұлттық ұланы 5511 әскери бөлімінің 200-ге жуық жас сарбаздары ант қабылдады. Салтанатты шараға «Шығыс» әскери өңірлік қолбасшылығының қолбасшысы Бауыржан Абжанов, Семей қаласы ІІБ басшысының орынбасары Мақсат Зекенов, Семей қаласы ішкі саясат бөлімінің басшысы Айдар Садырбаев және жас сарбаздардың ата – аналары қатысты.
{jcomments on}Отан алдындағы әскери борышын өтейтін жас сарбаздардың дені Оңтүстік Қазақстан, Алматы, Қызылорда облыстарынан. Сондықтан болар әскери өмірдің ең бір айтулы кезеңі саналатын ант қабылдау рәсіміне сарбаздардың ата – аналары көп жиналыпты. Осындай жандардың бірі — Алматы облысы Еңбекшіқазақ ауданының тұрғыны Сәлима Қасымқызы. Сәлима апай шаңырағының кенжесіне осындай жауапты сәтте қолдау білдіру үшін Семей қаласына арнайы келген екен.
— Міне, ұлымыз ер азаматтың қасиетті борышы саналатын Отан алдындағы әскери міндетін Семей жерінде өтеп жатыр. Біраз уақыт бұрын бөлім командирінің хаты келді. Онда ұлым жайында жазған жақсы пікір көңілімізді марқайтып тастады. Еліміздің іргесі тыныш болып, өркендей берсін, — деген ізгі тілегін жеткізді Сәлима Қасымқызы.
Жақсылық МҰРАТҚАЛИ,
«Семей таңы»
