Семей қаласы бойынша Мемлекеттік кірістер басқармасында «Елбасы Н.Ә.Назарбаевтың 5 инс-титуционалды реформаны жүзеге асырудағы Ұлт Жоспары – 100 нақты қадамы мен мемлекеттік кірістер органдарының сыбайлас жемқорлыққа қарсы іс-әрекеті» тақырыбында дөңгелек үстел өтті.
Жиынға Семей қаласы Мемлекеттік кірістер басқармасы басшысының орынбасары Мұхит Жұмағалиев, заңгерлік қызмет және салықтық құқықты түсіндіру бөлімі басшысының міндетін атқарушы Шырын Әмірханова мен үкіметтік емес ұйымдардың өкілдері қатысты.
5 институционалды реформаны жүзеге асырудағы 100 нақты қадамды алдағы 10-15 жылда іс-жүзінде орындау барысында Мемлекет басшысы қазақстандықтарды бір жағадан бас, бір жеңнен қол шығарып бірлесе күш салу керектігі туралы айтқан болатын. Аталмыш стратегиялық құжат саяси-әлеуметтік маңызы мен мәні терең 5 басты тақырыпты қамтиды. Бірінші реформаның негізіне сәйкес, кәсіби мемлекеттік аппартты қалыптастыру көзделген. Ол үшін мемлекеттік қызметке үміткерлер төменгі сатыдан бастап қабылдануы тиіс екені көрсетілген. Сонымен қатар жауапты қызметке алғашқы рет қабылданған азаматтарға сынақ мерзімінен өту міндеттелген. Дегенмен олардың жұмыстарының нәтижесі бойынша еңбекақыларын лайықты түрде көтеру де қарастырылған. Дөңгелек үстелде сөз алған Мемлекеттік кірістер басқармасы басшысының орынбасары Мұхит Жұмағалиев:
— 5 институционалды реформаны жүзеге асырудағы 100 нақты қадамда сыбайлас жемқорлықпен күресті күшейту мәселесі нақты көрсетілген. Ол үшін Үкіметке жаңа заңнамалық құжатты әзірлеу де тапсырылған. Сондай-ақ қоғамның кеселіне айналған бұл мәселені түп тамырымен жою мақсатында жемқорлыққа қарсы арнайы бөлімшені құру да жүктелген көрінеді. Бұдан бөлек «Индустрия-ландыру және экономикалық өсім» тарауында, 42-45-ші қадамдарда салықтық әкімшілік жөнінде айтылған. Соған сәйкес, 2017 жылдың 1 қаңтарынан бастап мемлекеттік қызметкерлер мен барлық азаматтар үшін кіріс пен шығысты жалпы жариялау кезең-кезеңімен енгізілетін болады, — дейді.
Сондай-ақ 43-ші қадам бойынша салық декларацияларын қабылдау мен өңдеудің орталық желісін құру көзделіп отырғанын, соның арқасында салық төлеушілер электронды құжаттарының бірыңғай мұрағатына кіру мүмкіндігіне ие болатынын, ал 44-ші қадамның негізінде жанама салық салу тетіктерін жетілдіру жолдары қарастырылғанын, яғни қосымша құн салығының орнына сатудан салық алуды енгізу мәселесі жан-жақты зерделенетінін, сонымен қатар, 45-ші қадамда жазылғандай, кіріс пен шығысқа салық есебін міндетті түрде енгізу арқылы қолданыстағы салық режімі оңтайлана түсуіне жол ашылатынын айтады мемлекеттік кірістер басқармасының мамандары.
Ведомство қызметкерлері кел-тіргендей, ағымдағы жартыжылдықтың өзінде салық пен төлемдердің есебінен мемлекеттік қазынаға 15 771,8 млн. теңге түскен. Өткен жылы бұл көрсеткіш 14 887,4 млн. теңгені құраған екен.
Жақсылық МҰРАТҚАЛИ, «Семей таңы»
