Мемлекет басшысы Нұрсұлтан Назарбаевтың Үкіметтің кеңейтілген отырысында отандық кәсіпорындарды қолдау қажеттігін атап көрсеткені баршамызға мәлім. Осы ретте «Қазақстанда жасалған» акциясы бастау алып, шығысқазақстандық тауар өндірушілер үшін акцияның айтарлықтай қолдауы болды.
{jcomments on}Семей қаласындағы «ШығысАжарТорг» ЖШС кондитер цехы — бүгінде мемлекеттік бағдарлама қолдауын сезініп отырған кәсіпорын. Заман талабына сай келетін кәсіпорынның құрылып, қалтқысыз жұмыс жасап келе жатқанына биыл тоғыз жыл. Қазір цех өнімдері ішкі нарықта ғана емес, көршілес Ресейге де экспортталуда.
«ШығысАжарТорг» ЖШС директоры Жанаргүл Жұмағалиеваның айтуынша, цехтың өнім өндіру мүмкіндіктері жағынан өңірдегі кәсіпорындардың ішінде өзіндік алар орны бар. Жанаргүл Жұмағалиева 90-шы жылдардың тоқырауы кезінде негізгі мамандығы мұғалімдікті тоқтатып, нарық заманына қарай сауда саласына бет бұрады. Алғашқыда тәттілерді алып-сатумен айналысады. Алматы мен Шымкент қалаларынан кондитерлік өнімдер әкеліп сата бастаған ол алыс жолда кейбір өнімдердің бұзылып кететінін байқайды. Осы тұста кәсіпкерге кондитер өнімдерін алыстан тасымалдамай-ақ өзімізде өндіріп, халыққа жаңа шыққан өнімдер ұсыну туралы ой келеді. Осылайша, кәсіпкер жеке ісін ашуды ұйғарады және қажетті құрылғылар сатып алады.
Шағын цехта біртіндеп жұмысшылар саны артып, өнім түрлері көбейеді. Осылайша, жеке кәсіпкер «Жұмағалиева» болып құрылған кондитерлік өнім өндіретін цех, 2012 жылы «ШығысАжарТорг» ЖШС болып қайта құрылады. Жалға үлкен ғимарат алып, бірнеше жыл жұмыс жасайды. Уақыт өте жұмысы жүріп жатқан цех заман талабына сай арнайы құрылғыларды қажетсіне бастайды. Осы тұста кәсіпкер «Даму» қоры арқылы 20 млн. теңге субсидия алып, заманауи құрылғылар сатып алады. Бұл қаражатқа арнайы екі өндірістік пеш пен өнімдерді жаз маусымында тасымалдауға тоңазтқышы бар техника сатып алады. Енді мәселе ғимаратта болады. Кәсіпкерге бұл тұста да мемлекеттік бағдарламаның қолдауы тиеді. Ұсыныс жасап, 2014 жылы «Даму» қорының «Өндіріс-2» мемлекеттік бағдарламасы арқылы төмен пайызбен 20 млн. теңге несие алып, цехқа қажетті ғимаратты сатып алады.
— Қазір нарықта бәсеке өте күшті. Тіпті көрші Ресейдің өнімдері өте көп болып кетті. Өткен жылы Ресей рублінің бағамы өзгергеннен кейін, аздаған қиыншылықтарды бастан өткердік. Дегенменен алдымызға қойған мақсатымыз бар. Алдағы уақыттада халыққа қажетті сапалы отандық өнімнің жаңа түрлерін ұсынуды көздеп отырмыз. Ең бастысы, бәсекеге қабілетті бола білуіміз керек, — дейді Жанаргүл Жұмағалиева.
Бүгінгі күні 35 адам жұмыспен қамтылған кондитер цехында жүзден астам өнім түрлері шығарылады. Сондай-ақ көпке танылып үлгерген мармелад өндіріледі. Кондитер өнімдерін шығару да аса талғампаздықты қажет ететіндігін айтады мұндағы мамандар. Сондықтан ұжым әр кез жаңа өнім түрлерін ойлап табумен де айналысады екен. Бір сөзбен айтқанда, бұл іс те үнемі ізденісті қажет етеді. Айта кетуіміз керек, кондитер цехы тапсырыспен пісіретін бауырсақ, шелпек, тоқаш өнімдері де семейліктердің сұранысына ие болған. Ал «ШығысАжарТорг» ЖШС-нің өнімдері Шығыс Қазақстан облысы, Астана, Павлодар, Қарағанды қалаларына , Ресейдің Рубцовск қаласына жіберіледі.
А. САМАТҰЛЫ,
«Семей таңы»
