Өткен аптаның бейсенбісінде қала әкімінің орынбасары Нариман Ақылжановтың төрағалық етуімен Семей қаласында техникалық реттеу және метрология мәселелері бойынша Өңірлік штабтың кеңейтілген отырысы өткізілді.
{jcomments on}Штаб отырысына ШҚО бойынша техникалық реттеу және метрология комитетінің жетекшісі Бақытқан Кунафиянов, Семей қаласының «Қазақстан стандарттау және сертификаттау институты» РМК-ның өкілдік басшысы Сергей Кузнецов пен аталмыш мекеменің эксперт-аудиторы Айнұр Билялова және ШҚО бойынша техникалық реттеу және метрология комитеті департаментінің Семей қаласындағы бөлімінің басшысы Ракш Шумаев, сондай-ақ мекемелер мен бизнес қауымының өкілдері қатысты.
Алғаш болып сөз алған Семей қаласының «КазСтИн» РМК өкілдік басшысы Сергей Кузнецов өз баяндамасында «Стандарттау туралы» ҚР-ның Заң жобасы концепциясы мен «Өлшем бірлігін қамтамасыз ету туралы» ҚР-ның Заңына өзгерістер мен толықтырулар енгізу туралы мәселелерге тоқталды.
— Бүгінгі күні елімізде мемлекеттік стандартқа қатысты осы екі негізгі Заң белсенді түрде талқылану үстінде. Бұл жұмыстар да бізде жыл басынан бастап жүргізілуде. Жыл соңына дейін жаңа Заң жобалары баспасөз беттерінде жарияланатын болады. Сондықтан бұл жұмыстардан сырт қалмай, талқылауға белсенді түрде қатысып, өз үлестеріңізді қосуларыңызға болады, — деген С.Кузнецов аталмыш Заңдарды өзгертуге Қазақстанның Дүниежүзілік сауда ұйымына кіруі себеп болғанын, соған сәйкес, отандық кәсіпкерлерді қорғауға бағытталған шаралардың бірі екенін атап өтті.
Отырыс барысында Семей қаласының «КазСтИн» РМК өкілдігінің эксперт-аудиторы Айнұр Билялова «Лак және бояу материалдарының қауіпсіздігі», «Тұрмыстық химия және синтетикалық жуғыш заттардың қауіпсіздігі», «Алкогольді өнімдердің қауіпсіздігі» және КО ТР «Темекі өнімдеріне техникалық регламенті» туралы баяндамасын жасады. Сонымен қатар ШҚО бойынша техникалық реттеу және метрология комитеті департаментінің Семей қаласындағы бөлімінің басшысы Ракш Шумаев СТ KZ формасының сертификаты бойынша туындаған мәселелерге түсініктеме берді.
Өңірлік штаб отырысы қоғамдық пікірталас кезеңінде техникалық регламенттер мен олардың жобаларын, жоғарыда аталған тұжырымдамасын қарастыру ұсынылады және ескертпелер беруге болатыны туралы айтылды.
Асан МЫРЗАХАНОВ,
«Семей таңы»
