«Тарлан» әмбебап дене шынықтыру және сауықтыру спорт кешенінде, Семей кекушинкай каратэ федерациясының 25 жылдығына орай, шығыс жекпе-жегі түрлеріне арналған сайыс өтті. Ката дәрежесінен өткен Республикалық ашық біріншілікке еліміздің әр облысынан 200-дей спортшы жиналыпты. Айтулы шараға шаһар басшысы Ермак Сәлімов арнайы қатысып, шаршы алаңға шыққандарға ақ жол тіледі.
{jcomments on}Сайысты «Бүкілқазақстандық кекушинкай каратэ ұйымы» республикалық қоғамдық бірлестігі қалалық дене шынықтыру және спорт бөлімінің қолдауымен өткізді. Айта кеткен жөн, кекушинкай каратэнің ката санаты бойынша республикалық турнир ел көлемінде тұңғыш рет ұйымдастырылыпты. Көпшілік алдында сөз алған шаһар басшысы аталмыш жекпе-жек өнері өңірімізде қарқынды дамып келе жатқанын айта келе, келер жылы қаламызда осы спорт түрімен айналысушыларға арнайы кешен салу көзделіп отырғанын жеткізді.
— Құрметті спортшылар, спорт ардагерлері және қала қонақтары. Сіздерді қаламызда ел бойынша алғаш рет өткізіліп отырған республикалық бәсекеге келіп, қатысуға ниет білдіргендеріңіз үшін алғыс айтамын. Мемлекет басшысы Н. Ә. Назарбаев спортқа үнемі ерекше көңіл бөліп келеді. Инфрақұрылымды дамытпай, спорттың болашағына зер салу қиынға соғатыны мәлім. Сондықтан да болар, Қазақстанның 2050 жылға дейінгі әзірленген стратегиялық құжатында спорт нысандарын салу айрықша көрсетілген. Президентіміздің тапсырмасын орындай отыра, біз ел тұрғындарына бұқаралық спортпен шұғылдануға мүмкіндік жасаймыз. Бүгінгі күннің өзінде Семейде 400-ге тарта спорттық құрылымдар халық игілігіне қызмет етеді. Онда қала тұрғындарының жартысы спортпен айналысады. 2016 жылы әсем шаһарымызда арнайы кекушинкай каратэ залын салу жоспарланып отыр. Оның құрылысы «Бүкілқазақстандық кекушинкай каратэ ұйымы» РҚБ-нің есебінен қаржыландырылады деп жоспарлануда. Бүгінгі сайыста өнер көрсеткелі тұрған жас таланттардың келешекте байрақты сындарда ел намысын абыроймен қорғайтынына мен кәміл сенемін. Мерейлеріңіз үстем болсын, — деп тілек білдірді Е.Бидахметұлы.
Өз кезегінде «Бүкілқазақстандық кекушинкай каратэ ұйымы» РҚБ-нің президенті Т. Найзабеков қала әкіміне спортты өркендетуге қосқан үлесі үшін құрмет білдіріп, каратэнің 1-ші дан иегері екендігін куәландыратын қара белбеу мен алғыс хатты салтанатты түрде табыс етті.
Бір айта кетерлігі, чемпионатта өзегелерден оқ бойы озып, жеңімпаз атанған саңлақтар ел құрамасының сапына алынады екен. Ал Тәжімұрат Толбайұлының айтуынша, іріктелген каратэшілер ағымдағы жылдың қазан айында Германияда жалауын көтеретін әлемдік сында ел намысын қорғайтын болады.
Байрақты аламандарда спортшыларымыз үнемі жеңістерге жетіп, көк Туымыз төрткүл дүниенің төрінде биіктен желбірейді деген сенімдеміз.
Ж. СҮЛЕЙМЕН,
«Семей таңы»
