Семей қалалық мәслихатының кезекті 44-ші сессиясы өтті. Сессия жұмысына қала әкімі Ермак Сәлімов, әкімдіктің бөлім басшылары мен қаладағы өзге де бірқатар мекеме жетек-шілері қатысты.
Жиын барысында күн тәртібі ретінде жеті мәселе қаралды. Алдымен өзіне жүктелген міндеттер мен оларды орындау жайында Семей қаласының әкімі Ермак Сәлімовтің есебі тыңдалды.
{jcomments on}Шаһар басшысы атап өткендей, өңіріміздің әлеуметтік-экономикалық дамуында айтарлықтай оң өзгерістер бар екен. Атап айтсақ, ағымдағы жылдың алты айының қорытындысы бойынша өнеркәсіп өндірісінің өсімі 3,6 %-ды құрапты. Шағын бизнес субъектілерінің саны 23,1 %-ға артып, меншікті табыс көлемі 5,3 %, орташа айлық жалақы 4,6 %-ға жоғарылаған. Ал өткен жылы мемлекеттік бюджетке 23 млрд. 143 млн. теңге көлемінде салықтар мен төлемдер түсіпті.
Тағы бір тоқталар жайт — ағымдағы жылдың қаңтар-маусым айларына өнеркәсіп өндірісінің көлемі 55,8 млрд. теңгені, нақты көлем индексі 103,6 %-ды құрапты. Өңдеу өнеркәсібінде қолданыстағы бағада 42417,8 млн. теңге сомасының өнімдері (тауарлар, қызметтер) өндірілді, нақты көлем индексі – 103,8 %. Өнеркәсіпте негізгі капиталға салынған инвестициялар 27 % өсіммен шамамен 5,5 млрд. теңгені құрапты. Сондай-ақ шағын бизнестің дамуына ықпал ететін негізгі факторлардың бірі – шағын кәсіпкерлікті мемлекеттік қолдау, шағын бизнестің қаржы ресурстарына қол жетімділігі үшін қолайлы жағдайлар жасау бағытындағы шаралар жүзеге асырылған. 2014 жылға және ағымдағы жылдың бірінші жарты жылдығына «Бизнестің жол картасы — 2020» бағдарламасы бойынша жалпы құны 2,3 млрд. теңгені құрайтын 50 жоба іске асырыл-ған. Субсидиялау құны 155,7 млн. теңгені құрап, соның ішінде ағымдағы жылдың басынан бастап жалпы құны 382,4 млн. теңгені құрайтын 13 жоба іске асыпты.
Ауыл шаруашылығына келер болсақ, 2014 жылдың қорытындысы бойынша жалпы өнімнің көлемі 21,02 млрд. теңгені құраған. Ет өндіру 6,9 %-ға артып, 25,8 мың тоннаға, сүт – 0,9 %, жұмыртқа 93,3 %-ға (14,4 млн. дана) жетіпті. Мал басының өскені байқалады. «Сыбаға» бағдарламасы бойынша 344 ірі қара түлігі сатып алынған. Бір бұл емес, ауыл шаруашылығы саласындағы ілкімді істер жетерлік. Мәселен, қалалық тұрғындарды сапалы әрі арзан бағадағы азық-түлік өнімдерімен қамтамасыз ету мақсатында 51 ауылшаруашылық жәрмеңкесі өткізіліпті.
Сонымен қатар қала әкімі Е.Сәлімов тұрғын үй құрылысын дамытудағы оң өзгерістерге де тоқталып, халық қалауларының сауалдарына жауап берді.
— Қалада 2012 жылдан бастап «Қолжетімді баспана — 2020» бағдарламасы жүзеге асырылуда. 2014 жылы қаржыландырудың барлық көздері есебінен 107,5 мың шаршы метр тұрғын үй немесе соның ішінде бюджеттік инвестициялар есебінен 50,96 мың шаршы метр, тұрғындардың өз қаражаты есебінен 56,5 мың шаршы метр тұрғын үй пайдалануға берілген. Ал ағымдағы жылы жеке инвесторлар есебінен салынған жалпы сомасы 3,3 млрд. теңге, жалпы алаңы 33,6 мың шаршы метрді құрайтын 8 үйді қолданысқа беру жоспарлануда, — деді өз сөзінде Ермак Бидахмет-ұлы.
Сессияда қаралған келесі сұрақтың бірі 2014-2015 жылдардағы жылу беру маусымының қорытындысы және 2015-2016 жылғы қысқы жағдайдағы жұмыстарға дайындық барысы болды. Аталмыш мәселе бойынша қалалық ТҮКШ, жолаушылар көлігі және автомобиль жолдары бөлімі басшысының орынбасары Мұрат Шәкәрімов жауап берді.
Сонымен қатар сессияда Семей өңіріндегі білім беруді дамытудың 2011-2020 жылдарға арналған мемлекеттік бағдарламасын жүзеге асыру туралы мәселелер де қарастырылды. Осы тұста сөз алған білім бөлімінің басшысы Наталия Фесенкоға қалалық мәслихаттың депутаты Риза Молдашева ұстаздардың еңбек демалысы ақысын алған-алмағанын, сондай-ақ үш аусымда білім беретін ошақтардың бар жоғын сұрап білді. Білім бөлімінің басшысы Наталия Фесенконың айтуынша, мұғалімдер осы уақытқа дейін еңбек демалысы ақысын түгелдей алған, алдағы уақытта тек тамыз айының еңбек ақысы берілетін болады. Қаланың бас педагогінің сөзіне сүйенсек, өткен жылы семейлік оқушылар № 19 және № 44 жалпы білім беретін мектептерде үш ауысымда оқыған. Биылғы жылы аталмыш екі мектептің оқушылары ата-аналардың келісімімен басқа білім ошақтарына тасымалданбақ. Оған арнайы қаражат та қарастырылып, тасымалдау бағыты белгіленген екен.
Сессияда Семей қаласының 2015-2017 жылдарға арналған бюджеті туралы шешіміне өзгерістер енгізу туралы және тұқым шаруашылығын дамытуға субсидиялар көлемін анықтау және беру жөніндегі ведомствоаралық комиссияның дербес құрамы туралы мәселелер қаралды. Сондай-ақ «Семей қаласы мәслихатының аппараты» ММ «Б» корпусы мемлекеттік әкімшілік қызметшілерінің қызметін жыл сайынғы бағалаудың әдістемесін бекіту туралы сөз болды.
Сессияда көтерілген мәселелер қорытындысын қалалық мәслихат депутаттары бір ауыздан қолдады және күн тәртібінде қаралған мәселелер бойынша шешімдер қабылдады.
Асан МЫРЗАХАНОВ,
«Семей таңы»
