Мәдениет үйінде Қазақ хандығының 550 жылдығына орай, ҚР Білім және ғылым министрлігі, ШҚО білім басқарамасы, өңірлік «Дарын» ғылыми-практикалық орталығы және Семей қаласы білім бөлімінің қолдауымен «Туады ерлер Ел үшін…» атты І Республикалық қазақ батырлық эпос жыршыларының байқауы өтті.
ҚР Білім және ғылым министрлігінің бас сарапшысы Роза Мұхаметжанқызы, Семей қаласы әкімінің аппарат басшысы Зәуреш Исабаева, қалалық білім бөлімінің басшысы Наталия Фесенко және зиялы қауым өкілдері көрермендер қатарынан орын алып, өрелі өрендердің өнерін тамашалады.
Байқаудың негізгі мақсаты — мектеп оқушылары арасында қазақ халқының батырлар жырын насихаттау, қазақстандық патриотизмге тәрбиелеу әрі ұлттық дүниетаным мен тарихи сана-сезімді қалыптастыру. Байқауға еліміздің барлық облысынан 100-ге жуық жыршы қатысуға ниет білдіріпті. Қатысушылар «Қайратты туған ер еді…» және «Алатаудай айбатың, ер екенсің айтулы» атты номинацияларында өзара бақ сынасты. Эпос жыршылары байқауының ашылу салтанатында алғашқы болып сөз алған Семей қаласы әкімінің аппарат басшысы Зәуреш Исабаева қала әкімінің атынан құттықтау лебізін жеткізіп, сайыскерлерге сәттілік тіледі.
— І Республикалық қазақ батырлық эпос жыршыларының байқауы адамзат дәуірінің өркениетіне, мәдениетіне, асыл сөз өнеріне баға жетпес үлес қосқан исі қазақтың перзенттері ұлы Абай, данышпан Шәкәрім, кемеңгер Мұхтар Әуезов дүниеге келген ұлылар мекенінде өтіп жатқанына қуаныштымыз. Биыл еліміз бойынша мерекеленіп жатқан мерейлі даталардың бірі Қазақ хандығының 550 жылдығы болса, Қазақ тарихында ақылдылығымен алқа топты аузына қаратқан, біліктілігімен ел билеген, ерлігімен жаудың бетін қайтарған батыр бабаларымыздың аз болмағаны белгілі. Есімдері тарихтың беттеріне алтын әріппен жазылған баһадүрлеріміздің ерлігі мен даналығын бүгінгі ұрпақ өзіне үлгі-өнеге етуі тиіс. Осы орайда республикамыздың әр өңірінен келген жастарымыздың батырлық эпос жыршылары сайысына қатысуы көңілімізге қуаныш сезімін ұялатады. Құрметті жас дарындар! Халқымыздың рухани мұрасынан сусындап, сусындап қана қоймай, оны көпшілікке насихаттап жүргендеріңізді ұлтқа деген сүйіспеншіліктеріңіз деп білеміз. Сіздерге артылған үміт ақталып, Мәңгілік Елімізді қалыптастыруда жасаған қадамдарыңыз сәтті болсын,- деді Зәуреш Рамазанқызы өз сөзінде.
Алғаш рет ұйымдастырылған эпос жыршылары байқауының жеңімпаздары мен жүлдегерлері ҚР Білім және ғылым министрлігінің І, ІІ, ІІІ дәрежелі дипломдарымен марапатталды.
Ж. СҮЛЕЙМЕН, Семей таңы»
