Қазақ инновациялық гуманитарлық-заң университетінің мәжіліс залында «Нұр Отан» партиясы Семей қалалық филиалының кезектен тыс ХХІІ конференциясы өтті.
Ольга Булавкинаның төрағалық етуімен өткен жиынға қала әкімі Ермак Сәлімов бастаған жергілікті билік өкілдері мен «Нұр Отан» партиясының мүшелері, партия ардагерлері және облыстық, қалалық мәслихат депутаттары, аталмыш партияның Семей қалалық филиалының Саяси кеңес бюросының мүшелері, бастауыш партия ұйымдарының жетекшілері, қоғамдық қорлар мен жастар ұйымдарының өкілдері қатысты.
Өз кезегінде сөз алған мандат комиссиясының төрағасы Имдат Эфендиев комиссияның шешімімен таныстырып өтті.
— Партия Жарғысына сәйкес, конференция барысында Бастауыш партия ұйымдарының 200 делегаты қайта сайланып, тізімге өзгерістер енгізілді. Конференция барысында айтылғандай, бастауыш партия ұйымдарының мүшелері мен жетекшілері, облыстық және қалалық мәслихат депутаттары, жемқорлыққа қарсы күрес қоғамдық кеңесінің төрағасы, партиялық бақылау комиссиясының төрағасы, соғыс ардагерлері мен еңбек ардагерлері, жастар ұйымдары мен БАҚ өкілдері, білім, ғылым, мәдениет саласының қызметкерлері мен өндіріс орындарының басшылары конференция делегаты болып табылады. Мандат комиссиясының уәкілдігі барлық делегаттарды растау туралы дауыс берулеріңізді сұрайды, — деген мандат комиссиясы төрағасының ұсынысын жиынға қатысушылар бір ауыздан қолдады.
{jcomments on}Конференция барысында күн тәртібіндегі сұрақтар талқыланып, «Нұр Отан» партиясы орталық аппарат пен ШҚО филиалының төрағасы, облыс әкімі Даниал Ахметовтің келісімі бойынша, партияның Семей қалалық филиалының конференциясы қаулысы негізінде, партия Жарғысының 9.6 бөліміне сәйкес, жиынға қатысушылардың бір ауыздан қолдап, дауыс беруіне байланысты қала әкімі Ермак Сәлімов «Нұр Отан» партиясы Семей қалалық филиалының төрағасы болып сайланды.
Жиын барысында сөз алған Ермак Бидахметұлы жиынға қатысушыларға бір ауыздан қолдау көрсетіп, үлкен сенім артқандарына өзінің алғысын білдіріп, «Нұр Отан» партиясы Семей қалалық филиалының төрағасы ретінде барлық күш-жігерін салып жұмыс істейтінін жеткізді.
Сонымен қатар кезектен тыс конференция барысында жиынға қатысушылардың дауыс беруімен «Нұр отан» партиясы Семей қалалық филиалы саяси кеңесінің құрамасына да өзгерістер енгізілді.
Жиын соңында қала әкімі Ермак Сәлімов тілшілер тобына сұхбат берген болатын.
— «Нұр Отан» партиясы Семей қалалық филиалының төрағасы болып тағайындалу – мен үшін үлкен абырой, екіншіден, үлкен жауапкершілік жүктейді. Ал артылған сенім мен жауапкершілік партиядағы әріптестерімізбен бірге алдағы уақытта атқаратын жұмыстарымыздың кепілі болмақ. «Нұр Отан» партиясы мүшелерінің зор қолдау көрсетіп отырғанына ризашылығымды білдіремін. Жалпы, қала басшысы ретінде жұмыс істеген 80 күн ішінде шаһардағы мәселелермен толықтай танысып шықтым. Мәселелердің барлығы қаланың әр тұрғыны үшін өте маңызды екені даусыз. Сондықтан Елбасының тапсырмасын бұлжытпай орындай отырып, халықтың жағдайын жақсарту мақсатында барлық күш-жігерімізді салып, аянбай еңбек ететін боламыз, — деп атап өтті Ермак Сәлімов.
Нұрдәулет КӘКІШЕВ, «Семей таңы»
