Апта сәрсенбісінде қала әкімі Ермак Сәлімов Семейдегі іргелі өндіріс ошақтарының бірі «СәтТранс» ЖШС-де болып, кәсіпорынның жұмысымен танысты. Кездесу барысында мекеме басшылығы бүгінгі таңдағы өндіріс пен таяу болашақтағы жоспарлары жайлы мәліметтермен бөлісті.
{jcomments on}Айта кетер болсақ, «СәтТранс» ЖШС Индустриализация картасы шеңберінде 2013 жылдың желтоқсан айында іске қосылған болатын. Бүгінде өндіріс қуаттылығы аса жоғары. Кәсіпорын жылына 50 мың шаршы метр тұрғын үй салуға қажетті құрылыс материалдарын өндіреді. Осы арқылы өңір тұрғындарын қолжетімді баспанамен қамтамасыз етуде елеулі үлес қосып келеді. Кәсіпорын қазіргі таңда толығымен автоматтандырылған, заманауи қондырғылармен жабдықталған.
Комбинатта шикізат материалдарын дайындаудан бастап дайын өнімді өндіруге дейінгі аралықта технологиялық үдерістің бүкіл тізбегі орналасқан. Зауытта сонымен қатар өз темір жол тұйық желісі, дайын өнімдер сақтайтын қоймасы және республикалық маңыздағы автотрассаға шығатын кірме жол бар.
«Сәт Транс» ЖШС-де шығарылатын материал ірі панельді үйлердегі материалдармен салыстырғанда екі есе жеңіл әрі құрамындағы темір үш-төрт есеге дейін аз. Бұл — өнімге жұмсалатын шикізат шығыны аза-йып, тұрғын үйлер анағұрлым арзанға түседі деген сөз. Сонымен қатар комбинат цехтарында әртүрлі пішіндегі бояулы тақтатастар шығарылады. Айталық, 1,20-дан 1,50 метрге дейін, 6 метрлік, 12 немесе 20 метрлік плиталарды арнайы тапсырыс арқылы да жасатуға болады. Комбинат өнімдері, қолжетімділігімен қатар, жылдам тұрғызылатындығымен де ерекшеленеді. Өйткені құрастырмалы нысан материалдарының 95 пайызы дайын күйде осы жерден шығады.
Қала әкімі Ермак Сәлімов зауыт басшылығынан қазіргі қалыптасқан қаржылық-өндірістік ахуал жайлы сұрастырып, тың мағлұматтарға қанықты. Қазіргі күні аталмыш өндіріс орнында аса өзекті мәселе жоқ. Қайта аймағымыздағы құрылыс индустриясының қарқын алуы себепті, сұраныс көлемі жыл өткен са-йын артып келеді екен.
Отандық индустриялық құрылыс комбинаты өнімдері, Шығыс Қазақстан өңірінен өзге, Астана қаласы мен Павлодар облыстарына да жібе-ріледі. Ресейлік құрылғылармен жабдықталған комбинат әзірге жылына 50 мың шаршы метр бетон материалдарын шығаруға қауқарлы. Сондай-ақ өнім түрлерін жаңартуды да қолға алған. Мәселен, жер сілкінісі кезіндегі сақтық үшін қажетті сейсмикалық каркас шығаруға да қол жеткізілген. Қорыта айтқанда, кәсіпорындағы қызу еңбек уақыт өткен са-йын жанданып келеді.
Асан МЫРЗАХАНОВ,
«Семей таңы»
