Семей қаласының Шәкәрім атындағы мемлекеттік университетінде «БАҚ қоғамдағы құқық бұзушылықтарға «нөлдік төзімділікті» қалыптастыру және халықтың сыбайлас жемқорлыққа сана-сезімі» тақырыбында семинар өтті.
{jcomments on}Жиынға мемлекеттік мекемелер мен құқық қорғау органдарының қызметкерлері, үкіметтік емес ұйымдар және БАҚ өкілдері, студенттер қатысты. Семинарда қоғамдық пікірге байланысты “нөлдік төзімділікті” белсенді және конструктивті қалыптастыру мәселесі талқыланды.
Қазақстан Республикасы Байланыс ақпараттандыру және ақпарат комитеті мен Еуропа құқығы және адам құқықтары жөніндегі институты бірлесіп ұйымдастырған аталмыш семинарда бұқаралық ақпарат құралдарының қоғамдағы рөлі сөз болды. Семинарға арнайы келген республикалық «Человек и закон» газетінің бас редакторы Марат Башимов аталмыш мәселе жөнінде сөз қозғап, елімізде заң бұзушылықтарды болдырмау үшін ұрпақ тәрбиесіне көп мән беру керек екенін атап өтті.
— Азаматтардың құқықтық сана-сезімін қалыптастыруда бұқаралық ақпарат құралдарының маңызды рөл атқаратындығы белгілі. Ал журналистика факультетінің студенттері жақын болашақта қоғамдағы құқық бұзушылықтарға «нөлдік төзімділікті» қалыптастыруға тікелей араласатын болады. Азаматтардың сот жүйесі туралы пікірі және заңды құрметтеуі журналистердің осы мәселеге қатысты көзқарасына және оны айқындауына байланысты қалыптасады, — деді Марат Башимов.
Өз кезегінде Семей қаласының Шәкәрім атындағы мемлекеттік университетінің ректоры, саяси ғылымдардың докторы, профессор Шәріпбек Әмірбеков те аталмыш мәселе жөнінде өзінің пікірін білдірді. Елбасының халыққа арнаған Жолдауындағы құқық бұзушылыққа «нөлдік төзімділік» қалыптастыру қағидасы қоғамның басты міндеттерінің қатарына енгенін, осы орайда елімізде идеологиялық көзқарас қалыптастыруда журналистердің рөлі орасан зор екенін, сол себепті елдің мұңын мұңдап, жоғын жоқтайтын қалам ұстаған білікті қауымның қатарын көбейту қажет екенін атап өтті Шәріпбек Ағабайұлы.
А. САМАТҰЛЫ,
«Семей таңы»
