Қара күз келіп, алдағы қыстың ызғарынан хабар сезіле бастаған шақта жаз бойы жүргізіліп жатқан жылу маусымына даярлық жұмыстары да қарқынын жоғарылатты. Ғимараттарды жылылау, күрделі және ағымдық жөндеу жұмыстары қайта пысықталып, қыстан қысылмай шығудың қамы жасалуда. Бұл ретте шаһарымыздағы жылу беру көздері мен әлеуметтік нысандардың қысқа әзірлігі, жүргізіліп жатқан ғимараттар құрылысын аяқтау қала әкімі Ермак Сәлімовтің қадағалауында. Халықтың тоңып қалмай, қатал маусымнан тосын сәттерсіз шығуы облыстағы басшылардың да назарында тұр.
{jcomments on}Аптаның сенбі күні қаламызға облыс әкімінің орынбасары Жақсылық Омар арнайы келді. Бұл сапарында Ж.Мұқашұлы шаһар басшысы Ермак Сәлімовпен бірге жаңадан тұрғызылған медициналық нысандардың қысқа даярлығын, биыл жүргізілген қайта жөндеу жұмыстарының аяқталу барысын көріп танысып шықты. Құрамында облыстық денсаулық сақтау басқармасының басшылары бар топ ең алдымен Семей шетінде жаңадан салынған Жедел медициналық жәрдем ауруханасы ғимаратына келді. Мұнда мекеме басшысы Қайноллан Мусиннен жүргізілген шаралар жайында толығырақ сұрап білді.
Айта кетерлігі, облыс әкімі Даниал Ахметов Семейге келген бірқатар сапарларында дәл осы мекемеде арнайы болып, құрылыс барысында жіберілген олқылықтардың орнын толтыру бағытындағы жұмыстарға қаныққан болатын. Тиісті тапсырмалар да берген еді.
Мекеме басшысының айтуынша, қазір мұнда аяқталуы тиіс үш міндет тұр. Атап айтсақ, жер асты кабельдерін жүргізу, техникалық этаждағы жұмыстарды аяқтау және ғимараттың кейбір бөліктеріндегі кафельдеу ісін тәмамдау қажет. Осы ретте бас мердігер Ұлықбек Шабданұлы алдағы он күннің ішінде бұл жұ-мыстарды аяқтауды міндетіне алып отырғандарын айтады. Жаңадан салынған ғимараттың қыр-сыры көп болатыны белгілі.
Осыдан соң Жақсылық Мұқашұлы қала іргесінен бой көтеріп жатқан жедел медициналық станциясы ғимаратына келді. Мұндағы жұмыстар қазіргі күні аяқталуға таяу. Қалып тұрған тек жылу мен су ғана болып тұр. Осы орайда мердігер компания түрлі себептерге байланысты құрылысты аяқтау жұмыстарын шамалы кешеуілдетіп жатыр. Дегенмен қазіргі қарқынмен алдағы қазан айында пайдалануға беру көзделуде. Бұл ретте Жақсылық Омар, облыс әкімінің тапсырмасы бойынша, аталмыш құрылыс жұмыстарын алдағы айдың 15-і күні толықтай аяқтау қажеттілігін қадап айтты.
Облыс әкімінің орынбасары сонымен қатар ғимарат ауласында сенбілік жүргізу керектігін де атап өтіп, бірқатар тапсырмалар жүктеді.
Қуаныш ЖОЛЫМБЕТ,
«Семей таңы»
