Қала әкімі Айбек Кәрімов кезекті аппараттық кеңесті мемлекеттік қызметкерлердің қоғам алдындағы беделін сақтау әрі орнықтыру тақырыбына арнады. Бүгінгі таңда мемлекеттік қызметкерлердің халыққа қызмет көрсету мәселесінде ең көп еңбек етіп, жұмыс мерзімінен тыс уақыттарын да осы бағытқа арнап келе жатқандығы белгілі. Сенбі, жексенбі күндері де жұмысқа шығуларына тура келеді. Осы саланы таңдағандықтан, олар мөлшерден артық жұмыс істеген кездеріне еш өкінбейді. Соған қарамастан мемлекеттік қызметкерлер атына орынды-орынсыз сынның жиі айтылатыны жасырын емес.
Бұл тақырып- мемлекеттік қызметкерлердің еңбегін бұлдау немесе олар-ға сын айтылмасын деген ойға негізделмеген. Мақсат — қоғам арасында, ақпарат құралдарында орын алып жататын алыпқашпа әңгімелерге тосқауыл қою. Демократиялық қоғамда өмір сүріп отырғандықтан әркімге өз ойын ашық айтуға шектеу болмайды. Мәселе, сөз бостандығын жеке пиғылын жүзеге асыру үшін мейлінше пайдалан-ғысы келетіндерге заң аясында тыйым салу. Сол арқылы тасада тұрып тас лақтыратындарды шындықтың бетіне тура қарауға үйрету.
Бүгінгі тақырыпты күн тәртібіне шығаруға себеп болған жайды да айта кетелік. «Флеш» және «Трибуна:Саясат алаңы» газеттерінің тілшісі Б. Темербаев мемлекеттік қызметкерлердің абыройын елеусіз қалдырып, шектен тыс әрекет жасаған (Ол жөнінде «Семей таңы» газетінің 14 қаңтар күнгі №3 санында толық жазылған). Дәлелсіз ақпарат беруінің соңы жалалы мақалалар жазуға әкеп соққан. Шындығына келгенде, мемлекеттік қызметкерлер үшін сырттай айтылатын сөздер мен жалпылама жазылатын ақпараттардың ақ-қарасын айырып, нақтылығын анықтауға көбінесе уақыт тапшы. Алтын уақытты арзан ұстанымдағы жандардың әрекетіне шығын қылғаннан гөрі, кәсіби бағытта толып жатқан міндеттердің мерзімінде жүзеге асуына жұмсау әлдеқайда тиімді. Сол үшін де артық-кем айтылып жататын деректерді елеусіз қалдыруға тура келмек. Өкінішке орай, мемлекеттік қызметкерлердің жаңағыдай уақыт жетіспеушілігін «кінәларын түсініп, сыналған жаймен келісіп отыр» деп есептейтіндер кездесіп жатады. Осындай түсінікке ерік берген Б. Темербаев Семей қаласы әкімі аппаратына қарасты қызметкерлердің жұмысын жоққа шығаруға тырысып, шындыққа жанаспайтын дүниелерді жазуды көбейтіп жіберген жағдайда қаншалықты төзуге болар.
Күн тәртібіндегі мәселе жөнінде осындай ой өрбіткен қала басшысы кеңеске қатысушыларды мемлекеттік қызметкердің беделіне негізсіз нұқсан келтіретін жағдайларға дер кезінде ден қойып, тиісті шара қолдануға шақырды. Олай болмаған жағдайда кейбір тілшілер кез-келген кемшілік үшін жергілікті билікті жазғыра салудан та-йынбайтын секілді. Өздерін шынайы журналист қатарына жатқызған, фамилиясын былғағысы келмеген адам не нәрсенің байыбына бармай, туындаған сұрақты тиісінше талдамай, көпшіліктің алдына шығармайды. Автордың сауатсыздығы немесе тәжірибесіздігінен дұрыс нәрсенің өзі бұрыс болып көрініп жатады. Мұндай олқылық ең бірінші кезекте көпшілікті істің нақтылығынан алыстатып, түрлі көзқарастардың қалыптасуына алып келеді. Атқарылған шаруаларды шала жеткізу немесе бұрмалап айту тұрғындардың мемлекеттік қызметкерлерге деген сенімін әлсіретпек. Мұндай жағдай кейбір жат пиғылды жандардың қоғамға жеке мақсаттарын таңуына да түрткі болуы мүмкін.
Мемлекеттік қызметкерлер қала шаруашылығының барлық бағыты бойынша өз үлестерін қосып келеді. Өмір болғандықтан барлық мәселені түбегейлі шешу бір ғана шенеуніктерге қатысты емес екені де белгілі. Алайда, өңірде кездесіп жататын түйткілдің бәрін мемлекеттік қызметкерлерге тіреп қою ақылға қонбайтын жағадай. Сондықтан, әр мемлекеттік қызметкер өз саласына қатысты ағат айтылған деректерге дер кезінде түсініктеме беріп, көпшілікке нақты жағдайды жеткізе білулері тиіс.
Бір ғана 2013 жылы қала аумағында атқарылған игілікті істердің аз емес екендігін қаншама ақпарат құралдары жарыса жеткізді. Өндіріс орындары кеңейіп, елеулі әлеуметтік жаңа нысандар бой көтерді. Өңіріміздегі микроэкономиканың үйлесімді дамуының нәтижесінде жергілікті қазына былтыр 1,5 млрд. теңгеге ұлғайып, оның 50 пайызын шағын және орта кәсіпкерліктен түсетін салық көлемі құрады. Ауылшаруашылық саласы 19,5 млрд. теңгенің өнімін игерсе, өндіріс орындары былтырғы жылмен салыстырғанда өнімді 40 млрд. теңгеге артық өндірді. Пайдалануға берілетін тұрғын үй алаңы 112 мың шаршы метрге ұлғайды. «Қолжетімді баспана-2020» бағдарламасы бойынша 400 ден астам отбасының пәтер мәселесі шешілді. Бұл бүкіл семей-ліктер мақтан тұтарлық табыс. Қала беделін арттыра түсетін осы және басқа да нәтижелі қадамдар мемлекеттік қызметкерлердің бірігіп жұмыс істеулерінің жемісі.
Мемлекеттік бағдарламалардың жергілікті жерде кеңірек орын алуын қамтамасыз ету қызметтік міндет, кәсіби парыз болғандықтан мемлекеттік қызметкерлер ешкім тыйым салмаса да өз еңбектерін насихаттауға тырыспайды. «Еңбектің бағасын ел өзі береді» деген қағиданы ұстанады. Оған бір жағынан ішкі мәдениеттің жемісі деп те қараған абзал. Десе де, атқарушы биліктің тындырып келе жатқан жұмыс-тарын жоққа шығарып, мемлекеттік қызметкерлердің беделін ел алдында түсіргісі келетін әрекеттерге әсте жол беруге болмас. Бұл бірінші кезекте елдің ішкі тыныштығын, ауызбіршілігін бұзбау үшін қажет. Береке мен бірлік болмаған жерде ортақ түсіністік орын алмайды. Түсіністік орын алмаған жерде алдыға қойған мақсат та орындалмайды. Ал, мемлекеттік қызметкерлердің мақсаты мен міндеті — өз саласы бойынша нәтижелі еңбек етіп, өңіріміздің әлеуметтік-экономикалық жағдайын жақсартуға барынша үлес қосу.
Қала басшысы Айбек Мүталапхан-ұлы жоғарыдағы жайларды айта келіп, Семей қаласы әкімдігі аппараты мен оның барлық бөлімдерінде моральдық ахуалдың орнықтылығын және кәсіби білікті мамандардың әрдайым қолдауға ие болып келе жатқандығына да мысалдар келтірді.
Қала әкімінің баспасөз қызметі.
Қала әкімінің есебі қарсаңында
