Семей қаласындағы қарттар мен мүгедектерге арналған медициналық-әлеуметтік мекемесінде 1 қазан – Қарттар күніне арнап түрлі шаралар өткізу дәстүрге айналған. Осындай шаралардың бірін мереке қарсаңында қаламыздағы БҰҰ ДБ-ның өкілдері өткізді.
{jcomments on}БҰҰ ДБ ел көлемінде өткізіліп жатқан әлеуметтік қайырымдылық форумы аясындағы шараны «Жанұя орталығы» ҚБ мен «Семей — менің үйім» ҚБ бірлесе отырып ұйымдастырды. Шара аясында әжелер балаларға тоқудан тренинг өткізсе, мекемедегі қазыналы қарттар мен мүгедек ер-азаматтар шахматтан өткен жолдастық кездесуге қатысты. Олар қаламыздың шахматшыларымен күш сынасып, мықтыларды іріктеді. Жалпы, мұндай жолдастық кездесу алғаш рет өткізіліп отыр. Дегенмен қала шахматшылары болашақта бұл игі істі дәстүрге айналдырмақ. ШҚО-дағы БҰҰ ДБ жоба үйлестірушісі Жанна Жибраеваның айтуынша, осындай шаралар қоғам мүшелерін бір-бірімен тығыз байланыстыруға мол мүмкіндік бермек.
— Семей қаласының қарттар мен мүгедектерге арналған медициналық-әлеуметтік мекемесінде осындай шараларды биыл үшінші жыл қатарынан өткізіп келеміз. Ондағы мақсат — мекеме қамқорлығындағы адамдарды қоғаммен байланыстырып, әлеуметтік көмек көрсету, — дейді Ж.Жибраева.
Шара аясында сондай-ақ қарттар мен балаларға арналып тәттілер қойылған дастарқан жайылды. Сонымен қатар қаламыздағы нашар көретін балаларға арналған мектеп – интернатының жасөспірімдері концерттік бағдарламаларын ұсынды. Жалпы, бұл — мекемедегі Қарттар күніне арналған жалғыз мерекелік шара емес, қайырымдылық шаралары алдағы бір ай көлемінде өткізілмек.
— Халықаралық қарттар күніне орай мекемеде бір ай көлемінде әртүрлі шаралар өткізіледі. Оның аясында әртүрлі мекемелердің қайырымдылық концерттері, мерекелік құттықтаулар, сыйлар жасалады. Қарттарымыз да қарап қалмай, өздерінің қолдарынан шыққан тоқыма бұйымдарын балалар үйіне табыстамақ. Бір сөзбен айтқанда, мекеме күтіміндегі азаматтар қоғамнан тыс қалмай, әртүрлі шараларға әрдайым белсенді түрде араласып келе жатыр деуге болады, — дейді Семей қаласының қарттар мен мүгедектерге арналған медициналық-әлеуметтік мекемесінің директоры Гүлмира Сексеналинова.
А.САМАТҰЛЫ,
«Семей таңы»
