Апта сәрсенбісінде «Нұр Отан» партиясының Семей қалалық филиалы ғимаратының қоғамдық қабылдау бөлмесінде қала әкімі Ермак Сәлімов шаһар тұрғындарын түрлі мәселелері бойынша қабылдады. Бұл жолы қала әкіміне жолығуға 42 азамат өтініш білдірген екен. Қоғамдық қабылдауда сонымен қатар әкімдіктің бөлім басшылары, денсаулық сақтау, құқық қорғау салаларының өкілдері де болды.
{jcomments on}Қала әкімінің қабылдауына алғашқы болып соғыс ардагері Жұмағазы Әзке-ұлы келді. Абай ауданының тумасы қалаға, пәтер жалдап тұратын қызының қолына көшіп келген екен. Қабылдауға келу себебі пәтер кезегінің созылып кетуі болыпты. Қарт майдангерге бұл жайында түсінік берген Ермак Сәлімов ақсақалдың кезекте үшінші болып тұрғанын, келесі жылы үй берілетінін жеткізді. Ардагер өз кезегінде алғысын білдірді.
Шаһар басшысына жолығуға келген тұрғындардың басым көпшілігі әлеуметтік мәселелерді алға тартты. Араларында баспана сұрап келгендері де, жұмысқа орналасуда жәрдем беруін өтінгендер де болды. Әйтсе де бірқатар қалалықтар көпшілікке ортақ тақырып- тұрғын үй — коммуналдық шаруашылық мәселелері бойынша да қала әкіміне өтініш жасады. Мәселен, қаланың Дальний ауданының тұрғыны Н.Васильевна Омская көшесіндегі жол жөндеу жұмыстары бойынша шағым айта келіпті. Жүргізіліп жатқан құрылыс кесірінен жол қиылысындағы бағдаршам істен шыққан. Сонымен қатар жол жиектеріндегі суағар арықтардың бітеліп қалуы тұрғындарды көктем кезінде еріген қар суының аулаларға кіруіне себеп бола ма деген уайымға салған екен. Бұл жайында жауап берген ТҮКШ жолаушылар көлігі және автомобиль жолдары бөлімінің бастығы Александр Генрих қолға алынған жоба бойынша жол жөндеу жұмыстарының әлі аяқталмағанын, шараларға байланысты бағдаршам уақытша тоқтатылғанын жеткізді. Жалпы, бұл тарапта жергілікті бюджеттен 1 млн. 400 мың теңге қаражат бөлініпті. Ал жол жиектеріндегі арықтарды тазалау қазан айына жоспарланғандықтан, алдағы апталарда жүргізілетін болады.
Ал өзін Мария апа деп таныстырған Рысқұлов көшесінің тұрғыны мүлде басқа мәселемен келіпті. Айтуынша, қызы медициналық колледжді өткен жылы бітірген. Қаладан жұмыс табылмауына байланысты, Үржар ауданына қарасты Мақаншы ауылындағы денсаулық сақтау мекемесінде аз мөлшердегі айлықпен еңбек етіп жүр екен. Тапқан табысы пәтерақыға кететіндіктен, ай соңына дейін жеткізе алмайды әрі Семейдегі кәрі анасына қарайласуға да мүмкіндігі жоқ. Осыны айтқан тұрғын «қызымды қасыма алсам, қаладағы емдеу мекемелерінің бірінен жұмыс тауып берсеңіздер» деген өтініш жасады. Бұл жайында шаһар әкімі қоғамдық қабылдауға қатысушы денсаулық сақтау басқармасы қызметкерлерінен бос орындар туралы сұрады. Нәтижесінде сала мамандары жас маманға түйіндемемен келіп жолығу керектігін айтты.
Жалпы, бұл күні қала әкімінің қабылдануына келген азаматтар жер қатынастары бойынша, сәулет және қала құрылысы мәселелері жөнінде, сондай-ақ кәсіпкерлік пен әлеуметтік қамсыздандыру ісі жайлы да өтініш-тілектерін жеткізді. Қабылдау шарасы барысында шаһар басшысы өз тарапынан мүмкіндігінше көмек жасалатынын айтса, бірқатар тұрғындарға сала мамандары жауап қайырып, тиісті кеңестер берді.
Қуаныш ЖОЛЫМБЕТ,
«Семей таңы»
