1 қазан – Халықаралық қарттар күні Семей қаласында да кең көлемде аталып өтті. Түрлі шаралардың қатарынан орын алған салтанатты жиын кеше түс ауа қалалық Мәдениет сарайында ұйымдастырылды. Бұл күні мерекелік жиынға қаламызда тұратын ардагерлер қауымы мол жиналды.
{jcomments on}Мерекелік шара шымылдығы ең алдымен ұлт аспаптар ансамблінің орындауындағы күмбірлі күймен ашылды.
Осыдан соң ресми түрдегі сөз кезегі Семей қаласының әкімі Ермак Сәлімовке берілді. Жиналған қариялар, соғыс және еңбек ардагерлері алдында құттықтау тілегін жеткізген шаһар басшысы аға буынды ардақтау бүгінгі ұрпақ үшін парыз екенін де атап өтті.
— Қадірлі ардагерлер, құрметті семейліктер! Біз әрқашан ардагерлерімізді ардақтап келген халықпыз. Дана халқымыз «Қарты бар үйдің қазынасы бар» деген нақылды тегін айтпаған. Үлкенге құрмет көрсетудің жастарға берер тағылымы өте зор. Аға буынның қаламыздың дамуына, экономикамыздың өрлеуіне қосқан үлесін біз жоғары бағалаймыз. Сіздер сонымен бірге қаншама шәкірт тәрбиелеп шығардыңыздар. Қазіргі таңда қарттарымыздың лайықты өмір сүруіне мемлекет үлкен көңіл бөлуде. Мен шын жүректен барлықтарыңызды осынау мерейлі күнмен құттықтаймын. Сіздерге мықты денсаулық, зор бақыт, шаңырақ шаттығын тілеймін,- деп ізгі тілек білдірді.
Шаһар басшысы сонымен қатар өз сөзінде кешегі өткен күндері еліміздің ертеңі үшін елеулі еңбек сіңірген бүгінгі қарттардың жетістіктері қазіргі буынның игілігіне айналғанын айта келіп, осындай шаттық сезімдерге толы күндері аман-есен кездесе беруге тілектес екенін де жеткізді.
Осыдан кейін қалалық Мәдениет сарайының өнерпаздары әзірлеген тартымды ән мен әуезді жырға кезек беріліп, аға буын өкілдеріне арналған концерттік бағдарлама жалғастық тапты.
Қуаныш ЖОЛЫМБЕТ,
«Семей таңы»
