Биыл қаладағы Әміре Қашаубаев атындағы мемлекеттік филармонияның құрылғанына 70 жыл толды. Қазақ хандығының 550 жылдығы мен Қазақстан халқы Ассамблеясының 20 жылдығына және ұлы Абайдың 170 жылдығына арналған, аталмыш өнер ұжымының мерейтойы қалалық Мәдениет үйінде кеңінен аталып өтті.
Еліміздің және бірқатар алыс-жақын шетелдердің үлкен сахналарында өнер көрсетіп, көрерменнің көзайымына айналған ұжымның мерейтойлық концертін тамашалауға жергілікті билік өкілдері, мәдениет саласының майталмандары мен қаланың зиялы қауымы және шаһар тұрғындары, студент жастар көп жиналды.
{jcomments on}Талай белесті бағындырған аталмыш өнер ұжымы қалалық, облыстық және республикалық байқауларға қатысып, жүлделі орындарды қанжығалауда. Естеріңізге салар болсақ, жуырда филармония әртістері, араға 90 жыл салып, өміршең өнер иесі Әміренің ізімен Франция еліндегі 20 күндік фестивальға қатысып қайтқан еді. Париж төріндегі фестиваль барысында кәрі құрлық халқына Ұлы дала елінің мәдениетін паш еткен семейлік өнер майталмандары Еуропа жұртшылығының жоғары бағасына ие болған екен.
Филармония директоры, ҚР-ның еңбек сіңірген мәдениет қайраткері Адай Азаматовтың айтуынша, өнер ұжымының әртістеріне Үкімет тарапынан қаржылай қолдау көрсетіледі екен. Сонымен қатар өнер ұжымының басшысы, жылдағы дәстүрге сай, биылғы маусымда да гастрольдік сапарларға шығып, түрлі деңгейдегі байқаулардан шет қалмайтындарын атап өтіп, филармонияның жұмысына тоқталды.
— Филармония қатарында «Бибігүл» қазақ халық аспаптары оркестрі, «Славянка» орыс халық аспаптары және «Кербез» фольклорлы ансамбльдері, камералық оркестр бар. Қазіргі таңда ұжымға Астана, Алматы қалаларынан келген жаңа әншілерді қабылдап жатырмыз. Сонымен қатар оркестріміздің қатары да жаңа әртістермен толығуда. Олардың арасында өнер академиясын тамамдаған домбырашылар мен қобызшылар бар. Жалпы, биылғы жылы әсіресе жастарды жұмыспен қамтуды қолға алдық. Ұжымымыз қазақтың құлақтың құрышын қандыратын өшпес дәстүрлі ұлттық музыкасымен көрермен қауымды тәнті етеді деген ойдамын,- деді Адай Зейнолдаұлы.
Жетпісінші маусымашардың шымылдығы «Бибігүл» қазақ халық аспаптары оркестрінің орындауындағы «Ақсақ құлан» халық күйімен ашылды. ҚР-ның мәдениет қайраткері, сазгер, дәстүрлі әнші Тұрсынғазы Рахимов пен Мафруза Өтеуленованың «Әз Жәнібек, Керей хан» әні көрерменнің ыстық қошеметіне бөленді. Жалпы, концерт барысында 20-дан астам шығарма орындалды. Ән мен күйге бөленген көрермен өнер майталмандарына құрмет көрсетіп, ықылас гүлдерін сыйға тартып жатты.
Ж. СҮЛЕЙМЕН, «Семей таңы»
