Еліміз бойынша барлық медициналық мекемелердің аккредитациядан өтуіне орай, медициналық мекемелердің халыққа қызмет көрсетудегі сапасын анықтау әрі Үкімет бекіткен талаптың қаншалықты орындалып жатқандығын бағалау мақсатында 27 қыркүйектен бастап Семейде де ҚР Денсаулық сақтау және әлеуметтік даму министрлігіне қарасты Денсаулық сақтауды дамыту республикалық орталығы, Аккредитация орталығы жұмыс істеуде.
{jcomments on}Биыл Шығыс Қазақстан облысы бойынша аккредитация жүйесінен қалалық, орталық әрі ауданаралық ауруханалар, аралас үлгідегі емханалар мен алғашқы медициналық-санитарлық орталықтар, ана мен бала орталығы және отбасылық емханалар сияқты 27 медициналық мекеме өтуде. Сыртқы кешенді бағалау жұмыстарын жүргізетін арнайы топтың құрамы 29 таңдаулы маманнан тұрады. Олардың қатарында Денсаулық сақтауды дамыту республикалық орталығының (ДСДРО) сарапшылары, медициналық және фармацевтикалық қызметті бақылау комитетінің мамандары, аккредитация шараларын жүргізетін қызметкерлер жұмыс істеуде. Сонымен қатар жасақталған инспекторлардан 7 сараптамалық топ құрылған екен. Алқалы топ Семей өңіріндегі 9 медициналық мекеменің қызметін бағаламақ.
— Семей қаласында ҚР Денсаулық сақтау және әлеуметтік даму министрлігінің № 676 бұйрығына сәйкес, бірыңғай стандартты аккредитациялау жұмыстарын атқарудамыз. Бұл стандарттар халықаралық кеңесшілердің көмегімен жетілдірілген. Ол емделушінің қауіпсіздігі мен оның толыққанды сапалы медициналық қызмет алуына бағытталған. Мұнда медициналық және фармацевтикалық қызметті бақылау комитетінің аймақтық департаментінің мамандары, тәжірибелі дәрігерлер және тәуелсіз сарапшылар жұмыс істеуде. Мұны ерікті түрде өткізіліп отырған шара деп қабылдау керек. Оның нәтижесі бойынша белгілі бір қатаң шешімдер қабылданбайды. Керісінше, өз тарапымыздан жергілікті ақ халаттылармен білгенімізбен бөлісіп, егер де кем тұстары байқалып жатса, кеңес беретін боламыз. Әзірге Семейдегі аралас үлгідегі № 3 емхана жұмысымен танысып жатқан жайымыз бар. Бұл мекеменің медициналық қызмет көрсету үлгісі жақсы жолға қойылған екен. Айта кету керек, осы емхана бірнеше жыл біздің министрліктің пилоттық жобасына қатысқан еді. Қауіпсіздік мәселесі де бұл жерде оң шешімін тапқан, — дейді ҚР Денсаулық сақтау және әлеуметтік даму министрлігіне қарасты Денсаулық сақтауды дамыту республикалық орталығы, Аккредитация орталығының жетекшісі Ботагөз Кауыпбаева.
Сонымен қатар Ботагөз Төлеуғалиқызы өз сөзінде аккредитациядан сәтті өткен медициналық мекемелерге мемлекеттік тапсырыс тағайындау жоспарланып отырғанын да атап өтті.
Ж. СҮЛЕЙМЕН, «Семей таңы»
