Семей қаласында тұратын Ұлы Отан соғысының қос ардагерін Ресейдің Курск облысының губернаторы Анатолий Михайлов Курск шайқасының 70 жылдығына орай марапаттапты. Мерекелік медальды өткен жұмада қалалық әкімдікте өткен жиында шаһар әкімінің орынбасары Зәуреш Исабаева салтанатты түрде табыс етті.
Ұлы Отан соғысын басынан аяғына дейін өткерген семейлік Ольга Янчук Курск шайқасының куәгері. Бүгін ол осы алапат шайқастың 70 жылдығына арналған медальді өңіріне қадады.
Ольга Тимофеевна майдан даласына 1942 жылдың 14 қаңтарында Жаңасемей ауданынан аттаныпты. Ұлы Отан соғысы жылдарында Молдова, Украина, Польша жерлерін фашизмнен тазартып, жеңіс мерекесін Чехословакия жерінде қарсы алыпты. Сұрапыл от пен оқтың арасында жүріп, қиындықты ерлермен бірге көтерді. Бірқатар орден, медальдардың иегері. Соғысты кіші лейтенант шенімен аяқтаған ол қазір жасы 91-ге келсе де әлі тың.
Марапаттау жиыны барысында О.Янчук сол бір күндерден естелік әңгімелер айтты. Әсіресе, Курск үшін болған соғыстағы танкілер шайқасы жайлы тебірене сөйледі. Сонымен қатар, елеп-ескергендері үшін осынау шараға ұйытқы болған барлық жандарға алғысын жеткізді.
— Біз көрген кешегі соғыс өртін енді өскелең ұрпақ басынан өткермесін. Бейбіт заманға ештеңе жетпейді. Соғыс қашанда қиыншылықтар мен қайғы-қасіреттер ғана әкеледі. Бүгінгі күні сұм соғыста өзіммен қатар жүріп, қарулас болған жандардың ешқайсысы арамызда қалмапты. Бұл марапатқа курск үшін болған шай-қаста ерлік көрсеткен барлық майдангерлер лайық деп білемін, — деді О.Тимофеевна.
Жиын барысында сөз алған Семей қаласы әкімінің орынбасары Зәуреш Исабаева ҰОС ардагеріне барша жерлестері атынан ілтипат білдіріп, Курск шайқасына 70 жыл медалін салтанатты түрде өңіріне қадады және де өз сөзінің соңында Ұлы отан соғысындағы Жеңістің 70 жылдық мерекесін бірге мерекелеуді жазсын деп тілек білдірді.
Қалалық ардагерлер кеңесінің төрағасы Амантай Доғалақовтың айтуынша, осыдан тұп-тура он жыл бұрын Курск доғасындағы майданға қатысқан ардагерлердің саны 70 шақты болатын. Бүгінде олардан екі адам ғана қалыпты.
Ал екінші майдангер Александра Доцукке бұл медальді үйіне апарып табыс етті.
Қ. ЖОЛЫМБЕТ.
