Ертіс бойы ежелден ән мен жырға, ұлттық өнер түрлеріне, халықтық мұраларға бай. Дәуірлер бойы қалыптасқан бұл құндылықтар күні бүгінге дейін ұрпақтан- ұрпаққа жалғастық табуда. Осы игі дәстүр тәуелсіздіктің бүгінгі таңында да көрініс тауып отыр. Мәселен, аптаның жексен-бісінде «Ертіс әуендері» атты орыс өнерінің ХІІ Халықаралық фестивалі болып өтті.
Ерекшелігі сол — биылғы шара Жеңістің 70 жылдық мерейтойлы мерекесіне, Қазақстан халқы Ассамблеясының 20 жылдығына орай ұйымдастырылыпты. Абай театрында өткен салтанатты шараға Семей қаласының әкімі Ермак Сәлімов те арнайы қатысты.
Аталмыш шараны ұйымдастырудағы мақсат көпұлтты елімізді мәдени-рухани тұрғыдан жақындастыру, сан ғасырлық тарихы бар орыс фольклоры жайлы танымдық мағлұмат қалыптастыру болатын. Фестиваль орыс әлеуметтік мәдени орталығының, қала әкімдігінің және Достық үйінің қолдауымен ұйымдастырылды.
Ең әуелі сахна төріне аталмыш фестивальдің осыған дейінгі жеңімпаздары шықты. Ән мен жырдан, ұлттық биден алдарына жан салмаған үздік өнер иелерін жиналған көпшілік ерекше құрмет-қошеметпен қарсы алды. Өнерпаздардың арасында, негізінен, Омбы, Барнауыл, Астана, Алматы, Қапшағай, Өскемен, Шемонайхадан келген ансамбльдер бар екен. Барлығы 80 адамнан асатын түрлі ұлт өкілдерінен тұратын 20 елдімекеннен келген өнер ұжымдарына көрермен қошеметі зор болды.
Ал осы күнге дейін 100-ден аса концерттік бағдарлама ұйымдастырылыпты. Оның барлығында да ел ішінен шыққан өнерпаздар орыс ұлтының төл өнерінен тұратын ерекше мәндегі ән-жырларды көпшілік назарына ұсыныпты.
Осылайша, фестивальдің қорытынды гала-концерті сән-салтанатымен басталып кетті. Ортаға орыстың частушкасымен Семей фольклорлық ансамблінің өнерпаздары шықты.
Бұл күні ән де әуеледі, мың бұралған бишілер де дәстүрлі орыс биін нақышына келтіре орындады. Ал аталмыш гала-концерттің соңында қала әкімі Ермак Сәлімов ХІІ Халықаралық фестиваль жеңімпаздарын арнайы құттықтап, салтанатты түрде Құрмет грамоталарын тапсырды.
Қуаныш ЖОЛЫМБЕТ,
«Семей таңы»
