Алматы қаласындағы ҚР Мемлекеттік Орталық музейі және Семейдің тарихи-өлкетану музейі өзара байланыс орнатып, көптеген ортақ шаралардың бастамашысы болып келеді. Осы ретте Ұлы Абайдың 170 жылдығына орай Алматыда «Абай әлемі» атты бірлесе ұйымдастырылған көрме ашылған болатын.
Көрменің ашылу салтанатында алғашқы болып ҚР Мемлекеттік Орталық музейінің директоры, белгілі этнограф-ғалым Нұрсан Әлімбай сөз алды. Ал өз кезектерінде Әл-Фараби атындағы ҚазҰУ «Абайтану» институтының директоры, профессор Жанғара Дәдебаев, халықаралық «Абай» қорының президенті Жұмабек Ашуұлы, «Қазақ әдебиеті» газетінің бас редакторы Жұмабай Шаштайұлы ұлы ақын шығармашылығы, оның мәселелері мен тәрбиелік мәні туралы сөз қозғады.
{jcomments on}Көрменің құндылығы мен ауқымын Семейдің тарихи-өлкетану музейі қорының 100-ден астам жәдігерлері арттыра түсті. Фотоматериалдар, мұрағат құжаттары, Абай заманындағы Семей көріністері, шығыс, орыс классиктері шығармаларының ертедегі басылымдары, ақын заманының бет-бейнесін көрсететін этнографиялық заттар көрмеден лайықты орын алды.
Көрме барысында мектеп оқушылары Абайға арнауларын оқыса, Абай атындағы Опера және балет театрының әртісі Нәйлә Жарна Абайдың «Қор болды жаным» әнін, ал Құрманғазы атындағы Мемлекеттік консерватория әншілері «Айттым сәлем, Қаламқас» әні мен «Абай» операсынан Ажардың ариясын орындады. Ал көрменің екінші бөлімінде Абай шығармашылығы, Семейдің тарихи-өлкетану музейінің тарихы туралы танымдық дәрістер тыңдаған оқушылар мен студенттер Абай өлеңдерін жатқа айтуға мүмкіндік алды.
Музей ғасырлар шежіресі мен өмірдің рухани қазынасы дейтін болсақ, көрмедегі ұлы ақын әлемін ашатын қос музей жәдігерлері алматылықтар мен қала қонақтарының құрметі мен ілтипатына бөленді.
Еліміздің музей кеңістігінде ұзақ жылдар бойы көшбастаушы болып келе жатқан Мемлекеттік Орталық музейімен Семейдің тарихи-өлкетану музейі қазақ халқының тарихы мен өнерін, мәдениетін өсер ұрпақ тәрбиесіне айналдыру жолында алдағы уақытта да рухани-мәдени байланыста қызмет жасайтын болады.
Шынар МҰРАТҚЫЗЫ, Семейдің облыстық тарихи-өлкетану музейі.
