Жуырда қаламыздағы Ф. Достоевский мұражайында ерекше көрме өтті. Бұл жолы тамашалаушы жұртшылық назарына саз балшықтан иленіп жасалған түрлі керамикалық бұйымдар мен мүсіндер қойылыпты. Мұражай қызметкерлерінің айтуынша, қолөнер ішіндегі ең сирек саналатын мұндай өнер түрінен аймағымызда алғаш рет көрме ұйымдастырылып отыр.
Көрмеге әсіресе мектеп оқушылары көптеп келіп жатты. Себебі аталмыш туындылар негізінен балаларды қызықтырады екен. Олай болатын да жөні бар, сөреге қойылған бұйымдар арасында мультфильм кейіпкерлері көп екен.
{jcomments on}Керамикалық заттар қатарында ежелгі орыс ұлтының тұрмыс-тіршілігін, таным-түсінігін бейнелейтін бұйымдар мол. Сонымен қатар автор қиялынан туған ерекше фантастикалық бейнелер де көрмеден орын тауыпты.
— Бұл өнер туындыларын жасау да, оны сақтау да оңай емес. Иленген саз балшық сынғыш келеді. Ал бұл бұйымдардың барлығын да біз саудаға шығарамыз. Себебі, бұл біздің кәсібіміз. Бұл ретте ұйымдастырылған көрмелердің де берері мол. Мәселен, Қара теңізден бастап Сібір қалаларының басым көпшілігінде арнайы таныстырылымы өткен болатын. Бүгінгі таңда мұндай кәсіппен айналысушылар мүлде жоқ деуге болады. Түрлі байқауларға қатысып, жүлделі орындар алдық. Мақтау қағаздарымыз да көп. Себебі жұртшылықтың өнердің бұл түріне қызығушылықтары жоғары. Әйтсе де, бізді Жапония елінде аса жоғары бағалады, — дейді отбасылық кәсіптің жетекшісі Михаил Жуков.
Аталмыш бұйымдарды сыйлық ретінде тарту етуге, сондай-ақ сәндік өнер туындысы ретінде сатып алатындар көп екен.
Қазіргі күні өнер иесі танымалдылығын кеңейту үстінде. Ол үшін шығармашылық жұмыстың жаңа қырын жолға қойыпты. Яғни, ермексаздан жасалған мүсіншелер арқылы мультфильмдер әзірлеуде. Алайда, бұл машақаты көп жұмыс екен. Мәселен, 3 минуттық көрсетілім түсіру үшін 2,5 ай уақыт кетіпті. Ал оған жұмсалатын қаражат дәл осындай мүсіндерді сатудан түсетін көрінеді.
Қуаныш ЖОЛЫМБЕТ, «Семей таңы»
