Апта жексенбісінде қала әкімі Ермак Сәлімов пен қалалық мәслихат хатшысы Бейсенбек Ақжалов барлық сала басшыларымен және қалалық мәслихат депутаттарымен бірге Восход кентінде болып, аталмыш аумақтағы бірқатар нысандарды аралап, № 34 мектепте жергілікті тұрғындармен кездесті.
Естеріңізге салар болсақ, өткен сәрсенбі күні қаланың Восход кенті тұрғындарының атынан келген Махмұт Сариевті қабылдап, қарияның өтінішін тыңдаған Ермак Сәлімов кент тұрғындарының сол жаққа қатынайтын қоғамдық көліктердің қызмет сапасы тұрғысында және басқа да мәселелері бойынша алдағы күндерде аумақ тұрғындарымен арнайы кезесетін болып келіскені жайында газетіміздің өткен санында хабардар еткен болатынбыз. Осы тұрғыда ақсақалдың сөзін жерге тастамай, демалыс күніне қарамастан уақыт бөліп, аталмыш аумаққа арнайы барған қала басшысы жұмыс тобымен бірге ең алдымен Восход кенті іргесіндегі Южный кентіне ат басын тіреді.
{jcomments on}Осыдан кейін жұмыс тобымен бірге №20 автобустың соңғы аялдамасына келген қала басшысы қоғамдық көліктің ішіне еніп, жүргізушісімен тілдесті. Сонымен қатар №35 және №50 автобустардың жолаушыларға қызмет көрсету сапасы жайлы ақпараттарға қанықты.
Сондай-ақ жұмыс тобымен бірге №17 дәрігерлік амбулаторияға барған қала басшысын аталмыш нысанның бас дәрігері Владимир Ли қарсы алып, мекеменің жұмысымен таныстырды. Владимир Лидің айтуынша, 7 учаскесі бар екі қабатты мекеме 14 мыңнан астам тұрғынға медициналық қызмет көрсетеді екен. Бұл тұрғыда 4-ші саяжайдан бастап Восход кентіне дейінгі аумақтың қамтылатынын айтқан Владимир Ли, сонымен қатар Южный кентінің тұрғындарына да қызмет көрсетілетінін атап өтті. Бас дәрігердің сөзіне сүйенсек, дәрігерлік амбулаторияға №35 автобустың қатынамауы тұрғындарға қиындық тудыратын көрінеді. Осы және басқа да мәселелер туралы құлағдар болған Ермак Сәлімов мекеме басшысына ғимарат маңына тазалық жұмыстарын жүргізіп отыруды тапсырды.
Нысандарды аралап шыққаннан соң қала басшысы мен қалалық мәслихат хатшысы бастаған топ №34 мектептің акт залында Восход кентінің тұрғындарымен кездесу өткізді. Жиынға дербес бөлімдер мен барлық сала басшылары, құзырлы мекеме мамандары қатысты. Қала басшысымен кездесуге келген кент тұрғындары көкейлерінде жүрген сұрақтарын қоюға мүмкіндік алды. Жиын барысында көпшілік жол, электр жарығы, көше тазалығы, қоғамдық көліктер қатынасы және балабақшаның жоқтығы сияқты мәселелер туралы сөз қозғады.
Сонымен қатар жиын барысында сөз алғандардың бірі Восход кентінен бірнеше шақырым қашықтықта орналасқан қала маңындағы Подхоз елдімекенінен балалардың мектепке қатынауы қиынға түсіп жүргенін, арнайы автобустың қажет екенін жеткізді. Бұл тұрғыда қала басшысына мектеп автобусының күнделікті 170 баланы тасымалдайтынын, алайда Подхоз елдімекенінің жолы тар болғандықтан, үлкен автобусқа кері айналуға мүмкін болмайтынын баяндаған №34 мектеп директоры Сергей Радионов шағын автобустың қажет екенін жеткізді. Ермак Бидахметұлы бұл ретте қалалық білім бөлімінің басшысы Наталия Фесенкоға осы мәселені шешу жағын қарастыруды тапсырды.
Өз кезегінде Наталия Фесенко келер жылы қала бойынша 5 балабақша салу жоспарда тұрғанын, соның бірі осы Восход кентінде салынатынын айтып өтті.
Сонымен қатар жиын барысында №2 шағын ауданында малдың қараусыз жайылып жүретіні жайлы да мәселе көтерілді. Қала басшысы құқық қорғау органдарының қызметкерлеріне бұл мәселені алдағы уақытта қатаң бақылауда ұстауды тапсырды. Сол сияқты жиында №34 мектепке жөндеу жұмыстарын жүргізу қажет екені жайлы да сөз болды. Өз кезегінде сөз алған Восход кентінің тұрғыны, қадірменді ақсақал Махмұт Сариев та аталмыш аумақтағы мәселелерді сөзіне арқау ете келе, қала басшысына жексенбі, демалыс күнге қарамай, тұрғындар алдына келіп, өтініш-тілектерін тыңдағаны үшін ризашылығын білдіріп, еңбегіне жеміс тіледі.
Тұрғындардың барлық сауалдары мен өтініш-тілектерін мұқият тыңдаған Ермак Бидахметұлы жұртшылықты мазалаған барлық мәселелердің назардан тыс қалмайтынын жеткізді.
— Мен сіздерге мәселенің бәрін бірден шешіп беруге уәде бермеймін. Дегенмен барлықтарыңыздың өтініш-тілектеріңіз орынды. Қордаланған мәселелердің барлығын қала бюджетінің мүмкіндігіне қарай рет-ретімен қарастыратын боламыз. Мысалы, қоғамдық көлік қозғалыстарының жүру кестесін бақылауда ұстаймыз. Жалпы, сіздер көтеріп отырған тақырып бойынша алдағы уақытта өздеріңізбен тағы да жүздесетін боламыз, — деді Ермак Бидахметұлы өз сөзінде.
Қала басшысы жиында қозғалған мәселелер бойынша құзырлы мекеме басшыларына тиісті тапсырмалар жүктеді.
Нұрдәулет ТАЛҒАТҰЛЫ,
«Семей таңы»
