Семей қаласының жұмыспен қамту және әлеуметтік бағдарламалар бөлімі мемлекеттік мекемесінің мәжіліс залында кәмелеттік жасқа толмаған балалар ісі және олардың құқығын қорғау жөнінде қалалық әкімдік жанынан құрылған комиссияның кезекті отырысы болып өтті.
{jcomments on}Бұл жолы да комиссия қарауына «қиын балалар» мен ата-аналық парызын дұрыс орындамай жүрген тұрғындардың істері ұсынылды. Учаскелік полиция қызметкерлері ертіп әкелген азаматтар арасында қала іргесіндегі шағын елдімекендерден келгендер көп екен. Солардың бірі Е есімді азаматша болды. Әйел ішімдік ішпейді. Жат әдеттері жоқ. Алайда, жасөспірім балалары үйлерінен жиі қашып кетеді екен. Бұл жөнінде учаскелік полиция бірнеше мәрте ескерту жасағанымен еш нәтиже болмапты. Азаматшаның балалары сабаққа да дұрыс қатыспайды. Көбінесе ауыл-үйді аралап, қайыр сұраумен айналысады. Түскен ақшаны қайда жарататыны және белгісіз. Үй бетін көрмей қаңғып кететіндіктен күтімдері де жоқ.
Комиссия мүшелерінің қойған сауалдарына әйел бар кінә өзімен бірге тұрып жатқан, заңды некеде жоқ мүгедек азаматтың кесірінен деген уәж айтты. Балалары бөтен еркекті ұнатпайды әрі жанұяда сыйласымдылық жоқ. Сол себептен жиі-жиі үйден қашып кетеді. Тұрмыстың ауыртпашылығынан өзінің де жүйкесі жиі сыр беріп, балаларға да, бірге тұратын ер азаматқа да дауыс көтеретінін, үйде ыдыс-аяқ жиі сылдырлайтынын жасырмады. Ал көшіп кетуге дайын тұрған баспана жоқ. Оның үстіне тұрақты жұмысы жоқ, әркімге жалданып нәпақа тауып жүргендіктен қаржылық қиындықтары бар екен. Әйел адамға қатаң ескерту жасалып, арнайы есепке алынды. Егер тиісті нәтиже шығармаса, аналық құқығынан айырып, балаларын жетімдер үйіне өткізу ұсынылды.
Мұндай көрініс комиссия қарауы барысында жиі тіркелді. Кейбірі көз жасына ерік беріп, түзелуге уәде беріп, кешірім сұраса, енді бірі жұмысқа орналастыруды өтінді.
Ішімдіктің салдарынан берекесіз отбасыға айналғандар арасында қаракөздер де кездесіп қалып жатты. Мәселен, 2002 жылы туған А есімді қыз баланың анасы дүниеден өткен соң әкесі араққа салынып ішуді дағдыға айналдырған. Нәтижесінде жасөспірімнің күтім көрмей, ас-сусыз да қалған күндері көп болыпты. Бөтелкелестерін үйге ертіп келіп, бөтен еркектерді жиі қондыратын әдет шығарған соң қыз баланы нағашы әпкесі қолына ал-ған. Қазір басқа мектепке сабаққа барып жүр. Онымен бірге қамқорлығына алған туысы мен сынып жетекшісі бірге келіпті. Оқушының оқу үлгерімі жоғары, талапты екендігін айтқан ұстазы оның әкесін әкелік құқығынан айыру туралы өтініш жасады. Ал учаскелік полицияның күшімен келген әкесі тағы да «ұрттап» алған екен. Комиссия мүшелерінің қой-ған сауалына ләм-мим деп жауап қайырмады. Нәтижесінде, комиссия жасөспірімнің сынып жетекшісі мен қамқорлығына алған туысының өтініштерін қанағаттандырып, маскүнем әкені әкелік құқығынан айыруды жөн деп тапты.
Бұл айтылғандар — кәмелеттік жасқа толмаған балалар ісі және олардың құқығын қорғау жөнінде қалалық әкімдік жанынан құрылған комиссияның қарауына ұсынылған 20 істен бірер мысал ғана. Тәртіп пен адамгершіліктен жұрдай бірқатар ата-аналар сөгіс арқалап, ескерту алып, полиция қадағалауына тапсырылумен қайтты. Енді біразы қаладағы наркологиялық диспансерге ем қабылдауға жатқызылатын болды. Дегенмен бұл жандардың барлығының әрекеттері қатаң қадағалауға алынбақ. Яғни, алдағы уақыттағы отырыстарда олардың ісі қайта қаралып, түпкілікті тағдыры шешілуі бек мүмкін.
Қуаныш ҚОЖАЕВ,
«Семей таңы»
