Семей қалалық әкімдігінде «Әйелдердің және отбасылық кәсіпкерліктің гендерлік мазмұны. Шығыс Қазақстандағы бағдарламалар мен даму қорларына қолжетімділік» тақырыбында конференция өтті. Басқосуға қоғам дамуына өзіндік үлес қосып жүрген іскер нәзік жан иелері қатысты. Сонымен қатар конференцияда әйелдер және отбасылық бизнестің дамуы да сөз болды.
{jcomments on}Семей қаласы әкімінің орынбасары Надежда Шарова конференция жұмысын аша отырып, Семей қаласында нәзік жандылардың қоғамдағы белсенділігі, іскерлігіне тоқталып өтті. Айта кету керек, елімізде 2006-2016 жылдарға арналған Гендерлік теңдік стратегиясы бекітілді. Бүгінде Семей қалалық әкімдігіне қарасты он бес дербес бөлім бар болса, оның алтауын қазір нәзік жандылар басқаруда. Сонымен қатар Семей қаласына қарасты төрт ауылдық округтің де әкімі әйел адамдар. Семей қалалық мәслихатының қатарында да төрт нәзік жан иесі халық қалаулысы атанған.
— Еліміз дербестігін алғаннан бастап, гендерлік тепе-теңдікке ерекше мән беріліп келеді. Қазіргі таңда әйелдер қауымы түрлі салада ер азаматтарымызбен тең дәрежеде еңбек етуде. Мемлекет басшысы Нұрсұлтан Әбішұлы Назарбаев «Қазақстан 2050: Бір мақсат, бір мүдде, бір болашақ» атты Жолдауында шағын бизнес отбасылық мұраға айналып, ұрпақтан ұрпаққа мирас ретінде берілу қажеттігін атап өткен еді. Бүгінде әйелдердің жеңіл өнеркәсіпте, сауда саласында, қонақ үйі және мейрамхана кәсібінде бағындырған белестері аз емес. Олардың іскерлігі нәтижесінде қаламыз әлеуметтік тұрғыдан қарқынды дамып келе жатыр, — деді қала әкімінің орынбасары.
Конференция барысында кәсіпкерлік төңірегіндегі мәселелер қызу талқыланды. Нәзік жандылар әлі де болса бұл салада өздерінің мүмкіндіктерін толықтай пайдалана алмай келеді екен. «Бизнес жүргізудегі жеңілдік» рейтингісінде Қазақстан ТМД елдері арасында көшбасшы орында болғандығына қарамастан, жаһандағы экономикалық дағдарыс пен өзге де факторлар әйелдердің осы саланы игеруіне қолбайлау болып отырған көрінеді. Сондықтан да болар ағымдағы семинар әйелдер және отбасылық бизнесті арттырумен қатар олардың мемлекеттік бағдарламаларға барынша қатысуына арналып отыр.
Жақсылық МҰРАТҚАЛИ,
«Семей таңы»
