Қазан айының соңғы жексенбісі байтақ еліміз бойынша әлеуметтік сала қызметкерлерінің кәсіби мерекесі саналады. Өзіндік ауыртпашылығы мол, аса күрделі сала мамандары жыл сайын осы мезгілде өздерінің төл мерекелерін атап өтеді. Бұл үрдіс биылғы жылы тым кең көлемде көрініс тапты. Себебі, аталмыш мерекенің бес жылдығына орай, қалалық әкімдікте шаһар әкімі Ермак Сәлімов абыройы еселі қызметкерлерді арнайы қабылдап, құттықтады.
Осыдан тура бес жыл бұрын ел Президенті Нұрсұлтан Назарбаев аталмыш атаулы мереке туралы заңға ресми түрде қол қойған болатын. Содан бергі аралықта осынау күні сала қызметкерлері жетістікті еңбектері жайлы өздерінен есеп алып, құттықтау жиындарын өткізуді дағдыға айналдырған. Алайда бұл шара тек халыққа әлеуметтік қызмет көрсететін мекемелердің өз ішінде ғана өтетін-ді. Биыл бұл үрдіс сәл өзгеріп, тұңғыш рет қала әкімі арнайы қабылдау өткізді.
— Сіздердің еңбектеріңіздің қаншалықты дәрежеде мәнді екенін жақсы білеміз. Ел тұрғындарының әлеуметтік тұрғыдан қорғалуы аса маңызды мәселе. Қазіргі күні бұл салада бірқатар семейліктер өнімді еңбек етіп жүр. Мұқтаж жандар қажеттілігі үшін өз жандарын сала қызмет ететін мамандардың жан жылуы мол екені анық. Қазіргі күні біз сіздердің еңбектеріңіздің нәтижелі болуына жағдай жасап, барынша қолдау танытудамыз. Осынау төл мерекелеріңіз құтты болсын, — деп атап өткен Ермак Бидахметұлы аталмыш сала мамандарын ресми құттықтады.
Осыдан соң марапаттауға кезек беріліп, абырой иелерінің мерейлері еселенді. Көп жылғы жемісті еңбегі мен кәсібилігі үшін, әлеуметтік қызметкерлер күнімен Семей қаласының жұмыспен қамту және әлеуметтік бағдарламалар бөлімінің әлеуметтік жәрдемақылар секторының бас маманы Бақыт Байдилдинова алғашқы болып қала әкімінің қолынан Алғыс хат алды. Сондай-ақ Семей қаласының зейнеткерлерге әлеуметтік қызмет көрсету мекемесінің қызметкері Гүлбану Әділбаева, зейнетақы төлеу жөніндегі мемлекеттік орталықтың маманы Жазира Байболова, жұмыспен қамту және әлеуметтік бағдарламалар бөлімінің кәсіптік оқыту секторының меңгерушісі Айнұр Бураханова, осы бөлімнің қаржы секторының меңгерушісі Зәуре Нұрмұхаметовалар да жи- налған әріптестерінің алдында құрметке кенелді.
Өз кезегінде құттықтау сөз тізгіні аталмыш саланың ардагерлері Қанатқали Құндақовқа берілді. Халыққа әлеуметтік тұрғыда қызмет көрсету ісінде ұзақ жылдар бойы еңбек өтілі бар маман өз сөзінде әріптестерін құттықтап өтіп, өзінің ізгі лебізін білдірді.
— Бұл сала мамандарының еңбегі өте ауыр. Себебі әлеуметтік мекемеге ешкім күліп келмейді. Таудай мәселесін арқалап, үміт етіп келеді. Олардың көңілінен шығып, жәрдем жасау үлкен біліктілікті, жан жылуын талап етеді. Әлеуметтік қызметкерден үлкен жауапкершілік талап етіледі. Сондықтан да осынау күрделі қызметте адал еңбек етіп жүрген баршаларыңызды кәсіби мерекелеріңізбен құттықтаймын, — деп атап өтті байырғы сала ардагері.
Қуаныш ЖОЛЫМБЕТ, «Семей таңы»
