Жуырда қаламыздағы физика-математика бағытындағы Назарбаев Зияткерлік мектебінде Вена балы өткізілді. Шараның мақсаты оқушыларды жоғары эстетикаға, мәдениеттілікке тәрбиелеу, әлеуметтік және азаматтық жауапкершілікті қалыптастырумен қатар, қайырымдылық шарасын ұйымдастыру арқылы өскелең буын бойына мейірім ұялату болатын.
Қайырымдылық негізіндегі аталмыш шараға қалалық ішкі саясат бөлімі басшысының орынбасары Нұржан Есенжолов, қоғамдық ұйымдар жетекшілері, әлеуметтік серіктес мектептердің директорлары, жас өнерпаздар және қаламыздағы белді кәсіпкерлер мен оқушылардың ата-аналары қатысты.
{jcomments on}Игілікті шараның негізгі бөлімінде «Жүректен жүрекке» атты концерт пен «Аялы алақан» қайырымдылық аукционы ұйымдастырылды. Оның аясында аталмыш білім ордасындағы «Шебер» үйірмесінде шығармашылықпен айналысатын оқушылар жасаған түрлі әшекей бұйымдар саудаға қойылыпты. Бұл ретте кәсіпкерлер және шаһардың ірі өнеркәсіп өкілдері аукционнан шет қалмай, жомарттық танытып, өз үлестерін қоса білді. Ұйымдастырушылардың айтуынша, қайырымдылықтан түскен қаражат мүмкіндігі шектеулі балалардың емделуіне жұмсалмақ. Шара нәтижесінде шамамен 320 мың теңге көлемінде қаржы жиналыпты. Бұл қаражатты «Назарбаев Зияткерлік мектебі» ААҚ Семей филиалының директоры Бағдан Қайыржанов шара қорытындысында, балғындарға жайылған дастарқан басында мүмкіндігі шектеулі алты балаға салтанатты түрде табыс етті. Сондай-ақ әрқайсысына планшеттер сыйға тартты.
– Вена балы дүниежүзілік ЮНЕСКО ұйымының тізіміне енгені белгілі. Біздің мектебімізде ол екінші жыл қатарынан өтіп отыр. Бұл құндылықты барлық халықтарға ортақ мәдени мұра деп санаймыз. Сондай-ақ аталмыш шара балаларымызды жоғары мәдениеттілікке тәрбиелеуге септігін тигізеді. Бұған қоса осы арқылы оқушыларымызды қоғамның әлеу-меттік жағынан қорғалмаған мүшелеріне қолдау көрсетуге дағдыландыруды көздедік. Себебі әлеуметтік жауапкершілікті қаперден шығаруға болмайды. Ол тек белгілі бір кәсіпкерлерге ғана міндетті болмауы тиіс. «Жұмыла көтерген жүк жеңіл» демекші, барлық қоғам өкілдері көмекке зәру жандарға барынша қол ұшын беруге талпынуы қажет. Екінші жағынан, шәкірттеріміздің төрткүл дү-ниенің үздік мәдениет мұраларын біліп, танып, меңгергені абзал, — деді Бағдан Тоқтамысұлы.
«Вена балының» екінші бөлімінде 9-12 сынып оқушылары Шәмші Қалдаяқовтың «Сен сұлу» әніне классикалық бидің озық үлгілерін көрсетті. Ақ көйлектегі арулар мен сырбаз бозбалалар ырғақпен мың бұрала билеп, көпшіліктің қошеметіне бөленді.
Бұдан кейін әр жұп әлемдік ауқымдағы Джо Дассен, Тото Кутуньо, Лара Фабиан, Уитни Хьюстон, Алла Пугачева және «Муз Арт» тобы сынды өнер иелерінің танымал әуендеріне шыр айнала вальс биледі. Жалпы, бұл әсем көрініске 370-ке тарта оқушы қатысқан екен. «Мейірім мен игілікке толы «Вена балы» келер жылы да өз жалғасын табатын болады»,- дейді тағылымды шараның ұйымдастырушылары.
Жақсылық МҰРАТҚАЛИҰЛЫ,
«Семей таңы»
