Қалалық әкімдікте Қазақстан Республикасының 2015-2025 жылдарға арналған Сыбайлас жемқорлыққа қарсы стратегиясының бағыттарын түсіндіру мақсатында ҚР Мемлекеттік қызмет істері және сыбайлас жемқорлыққа қарсы іс-қимыл агенттігінің Шығыс Қазақстан облысы бойынша департаментінің өкілдері мемлекеттік қызметшілермен кездесу өткізді.
Іс-шараға аталмыш агенттіктің ШҚО бойынша департаментінің басшысы Ғалымбек Досанов, департамент басшысының орынбасары – тәртіптік кеңес төрағасы Тоқтамыс Жұмағұлов, Семей қаласы әкімінің орынбасары Надежда Шарова, бөлім басшылары мен мамандары және БАҚ өкілдері қатысты.
Алғаш болып сөз алған Ғалымбек Досанов сыбайлас жемқорлыққа қарсы іс-әрекеттің өзектілігін түсіндіре отырып, қоғамның барлық күшін сыбайлас жемқорлыққа қарсы күреске жұмылдырудың маңыздылығын атап өтті.
{jcomments on}Сонымен қатар жиын барысында аталмыш қоғам індетімен күрес мәселесіне мемлекеттік қызметшілердің көңілін аудару, құқықтық сауаттылық пен сыбайлас жемқорлыққа қарсы мәдениетті қалыптастыру тұрғысында сөз қозғаған департамент басшысы ҚР-ның 2015-2025 жылдарға арналған Сыбайлас жемқорлыққа қарсы стратегиясының негізгі бағыттары мен оны жүзеге асыру шараларын, сонымен қатар Қылмыстық іс жүргізу кодекс-терінің ерекшеліктері мен өзгерістерін жіті түсіндіріп өтті.
— Біздің департаменттің негізгі мақсаттарының бірі азаматтар бойында сыбайлас жемқорлыққа қарсы мәде-ниет, берік иммунитет қалыптастыру болып табылады. Бұл қызмет азаматтардың құқықтық мәдениетін арттыруға және оларды құқықтық тұрғыдан сауаттандыруға бағытталған. Сондықтан өкілеттілікті қызметтен тыс пайдаланбау, азаматтардың заңды мүдделері мен құқықтарын қорғау сияқты негізгі талаптарды орындауды біз, ең алдымен, өзімізден бастауымыз қажет. Қазіргі уақытта барлық деңгейде жемқорлыққа қарсы күрес жөнінде арнайы іс-шаралар жүргізілу үстінде, — деді Ғалымбек Досанов.
Өз кезегінде департамент басшысының орынбасары Тоқтамыс Жұмағұлов азаматтардың жемқорлық фактілеріне баруының бір себебі өз құқығын, мемлекеттік қызметтің қалай көрсетілетінін білмеуінде жатқанын айтып өтіп, адамдардың ақпараттану деңгейін көтерудің маңыздылығына тоқталды.
Сонымен қатар дәл осындай кездесуді аталмыш департамент өкілдері қалалық ІІБ-да ұйымдастырды. Оған қатардағы тәртіп сақшыларынан бастап барлық бөлімнің жетекшілері қатысты. Іс-шара ҚР Мемлекеттік қызмет істері және сыбайлас жемқорлыққа қарсы іс-қимыл агенттігінің ШҚО бойынша департаменті басшысының орынбасары Т. Жұмағұлов пен Семей қаласы ІІБ-ның басшысы Ж.Исадиловтың төрағалығымен өткізілді. Кездесу барысында Тоқтамыс Қадошұлы жи-налғандарға жуырда ҚР Парламентінде қабылданған Мемлекеттік қызмет туралы Заңды бүге-шүгесіне дейін түсіндіріп өтті. Және де сыбайлас жем-қорлыққа қарсы бағытталған жаңа стратегияның негізгі тұстарына да тоқталды.
— Елбасы ұсынған бес институционалдық реформаны жүзеге асырудағы «100 нақты қадам» құжатының 1- бөлімінде кәсіби мемлекеттік аппарат құру туралы жазылғаны жөнінде сіздер жақсы білесіздер. Мықты билік органдарын қалыптастыру тек жоғарғы ведомстволарға ғана қатысты деген ұғым қате. Ел Үкіметінен бастап төменгі ауылдық округтерге дейін өз міндеттерін мүлтіксіз орындауы тиіс. Ұлт Көшбасшысы жүктеген саяси мәні мен маңызы зор қадамдарды жүзеге асыруда баршамыз жұмыла кіріскеніміз абзал. Енді мемлекеттік қызметке үміткерлер 3 кезеңнен өтіп, іріктеліп алынатын болады. Ол — сынаққа қатысушылардың кәсіби біліктілігін анықтауға мүмкіндік бермек. Қазіргі жүйе көрсеткендей, мемлекеттік қызметшілердің 67%-ы сынақты тапсыра алмай, сүрініп жатыр. Ал олардың ішінде білімді және іскер азаматтар жетерлік. Сол себепті жаңа үш сатылы іріктеу жүйесі осы олқылықтардың алдын алуға септігін тигізеді деп білеміз. Ең бастысы, қызметкерлерді жасақтауда біз үміткерлердің кәсіби шеберлігіне мән беретін боламыз. Яғни мемлекеттік аппаратқа лайықты тұлғалар таңдап алуды көздеп отырмыз, — деді өз сөзінде Т. Жұмағұлов.
Бұдан өзге жиында 2014 жылы 26 желтоқсанда Елбасы өзі бекіткен 2015-2025 жылдарға арналған Сыбайлас жемқорлыққа қарсы стратегияның негізгі бағыттары жөнінде де әңгіме қозғалды. Саяси құжаттың басты ерекшелігі — онда алдағы жылдарда қоғамның кеселіне айналған жемқорлықты тамырымен жоюға бағытталған кешенді мақсаттар мен міндеттер нақты көрсетілген екен. Осы ретте облысымыздағы ҚР Мемлекеттік қызмет істері және сыбайлас жемқорлыққа қарсы іс-қимыл агенттігі департаментінің өкілдері құқық қорғау органдарын аталмыш келеңсіздіктің алдын алуда бірлесе жұмыс атқаруға шақырды.
Асан МЫРЗАХАН,
Жақсылық МҰРАТҚАЛИ,
«Семей таңы»
