Қазақстанда кәсіпкерлікті дамыту мәселесіне айрықша мән беріліп, бұл салаға мемлекет тарапынан жан-жақты қолдау көрсетілуде. Экономикамызда шағын және орта бизнестің үлесі артқан сайын, Қазақстанның дамуы да орнықты бола түсетінін және Қазақстан бизнесті жүргізуге ең қолайлы жағдайы бар елдер тобына кіретінін атап өткен Мемлекет басшысы: «Бизнесті дамытуға кедергі келтіретін барлық енжар құқықтық нормалардың күшін жою керек. Шағын және орта бизнес 2050 жылға қарай Қазақстанның ішкі жалпы өнімінің қазіргі 20 пайызы орнына кемінде 50 пайызын өндіретін болады»,-деген еді.
Қазір осы шағын және орта кәсіпкерлікті дамытудың басым бағыттарын жүзеге асыру үшін тиісті шаралар атқарылып жатыр. Мемлекет басшысының тапсырмасымен жарияланған мораторий кәсіпкерлік қызметті дамытуға жол ашты және ол үлкен көмек болды. Дегенмен кәсіпкерлердің әлі де болса өз ісін жүргізуде әртүрлі қиындықтарға тап болатыны жасырын емес. Бұл мәселе апта сәрсенбісінде Семей қаласындағы Кәсіпкерлерге қызмет көрсету орталығындағы қала кәсіпкерлеріне арналған дөңгелек үстелде талқыланды.
Дөңгелек үстел басындағы пікір алмасуға «Parasat Consulting» ЖШС-нің тәуел- сіз директоры Алмас Есенғұжанов, Семей қаласы прокуратурасының аға прокуроры Қаныш Матаев, қалалық кәсіпкерлік бөлімінің басшысы Марат Нүгеров, жер қатынастары бөлімінің басшысы Сүлеймен Медеуов, сондай-ақ ШҚО бойынша «Даму» қорының Семей қаласындағы өкілі Анжела Маслова мен Кәсіпкерлік палатасы Семей қалалық филиалының директоры Ардақ Әділжанов және қаладағы кәсіпкерлер қатысты.
«Parasat Consulting» ЖШС ұйымдастырған дөңгелек үстелдің негізгі мақсаты — шағын және орта кәсіпкерлікті қолдаудағы мемлекет саясатын жүзеге асыру, әкімшілік кедергілер мен туындаған мәселелердің алдын алу жолдарын талқылау. «Parasat Consulting» ЖШС директорының міндетін атқарушы Саят Есенгужиновтың айтуынша, аталған отырыстың кәсіпкерлерге тигізер пайдасы өте зор. Өйткені шаһар кәсіпкерлері көкейлерінде жүрген сауалдарын сала мамандарына тікелей жолдай алады.
— Әрине, осындай дөңгелек үстелдердің кәсіпкерлерге берер пайдасы мол. Кәсіпкерлердің әлі де болса түрлі кедергілерге кездесіп жататыны жасырын емес. Бұл ретте кейде банк жүйесі мен мемлекеттік басқару жүйесінде де кемшін тұстар кездеседі. Бірқатар мәселелер дөңгелек үстел басында талқыланады. Сонымен қатар кәсіпкерлер туындаған сауалдарын сала мамандарына тікелей жолдауларына мүмкіндік алды, — дейді «Parasat Consulting» ЖШС-нің өкілі Саят Есенгужинов.
Асан МЫРЗАХАН,
«Семей таңы»
