Елбасы, Ұлт Көшбасшысы Нұрсұлтан Назарбаевтың бес институционалдық реформасын жүзеге асыру аясында туындаған «100 нақты қадам» атты Ұлт Жоспары әсіресе бүгінгі жастар үшін елеулі міндеттер жүктейді. Бұл ретте еліміздегі экономика және қаржы саласына маманданып жүрген студент жастарға зор сенім артылып отыр. Апта бейсенбісінде, яғни кеше, қаламыздағы іргелі жоғары оқу орны Қаз ИГЗУ-де «100 нақ-ты қадам: экономикадағы серпін» атты XIV Республикалық олимпиада басталды.
Экономика мамандықтары бойынша тәлім алатын студенттер біліктілігі сынға түсетін аталмыш білім сайысына еліміздің әр түкпірінен сегіз команда сайланып келіпті. Аталмыш шараны ұйымдастырушы Қаз ИГЗУ-дің қаржы — экономика факультетінің деканы, профессор Саябек Зиядиннің айтуынша, бұл жолғы олимпиаданың Семей қаласында өту себебі- өткен жылы Қарағанды қаласындағы Қазпотребсоюз университетінде өткен байқауда жергілікті «Алаш» командасы бас жүлдені еншілепті. Қалыптасқан дәстүрге сай, кезекті білім сайысы жеңімпаз команданың оқу орнында өтеді екен.
Олимпиаданың ашылу салтанатында Қаз ИГЗУ-дің ректоры, саяси ғылымдарының докторы, профессор Шырын Құрманбаева құттықтау сөз сөйледі.
— Құрметті олимпиада қатысушылары, қадірменді меймандар. Экономика саласы мамандықтары бойынша өткізіліп отырған бұл олимпиадаға Қош келдіңіздер дейміз. Дәстүр бойынша аталмыш білім сайысын біздің университетімізде өткізу құзыретімізге беріліп отыр, — деп атап өте келе, сайысқа қатысушы студенттерге жетістік тіледі. Сонымен қатар Қаз ИГЗУ жайлы да мағлұматтармен бөлісіп, таныстырып өтті.
Шырын Асылханқызының айтуынша, қазіргі күні оқу орнында сапалы білім алуға қажетті барлық жағдай жасалған. Мәселен, студенттердің бос уақытын тиімді пайдалануы үшін дебат клубтары, «Үркер» жастар театры, «Қазақстан жолы» атты тәрбие және білім орталығы жұмыс істеуде. Нәтижесінде бүгінгі таңда бәсекеге қабілетті маман даярлауда республика бойынша алдыңғы қатарға шығып отыр.
Осыдан кейін олимпиада қазылар алқасының төрайымы Рысқұлов атындағы Жаңа экономикалық университетінен келген мейман, республикалық оқу-әдістемелік кеңесінің «Қаржы» секциясының төрайымы, экономика ғылымдарының докторы, профессор Сәуле Ынтықбаеваға сөз берілді. Алматылық мейман өз сөзінде қазіргі таңда экономика және қаржы саласын игеруге маманданып жүрген студенттерге көп көңіл бөлініп жатқанын жеткізе кетті. Оның бір себебі — Мемлекет басшысының «Ұлт Жоспары — 100 нақты қадам» атты бағдарламалық құжатында дәл осы сектор бойынша айрықша басымдықтар берілген. Ал бұл ретте студенттердің таным көкжиегін кеңейтіп, өздерінің болашақ мамандықтарына деген сүйіспеншіліктерін арттыру үшін аталмыш олимпиаданың берер тағылымы мол болмақ.
Осылайша, республикалық олимпиада ресми түрде басталып кетті. Білім сайысын қамтитын іс-шаралар алдағы үш күнге созылмақ. Оның ішінде кейбір бөлімдерге тоқтала кетер болсақ, студенттер «Бүкіләлемдік сауда ұйымына Қазақстанның кіруі: мәселелері мен келешегі» тақырыбында креативті эссе жазып, экономика пәні бойынша викториналық блиц-турнирде бақ сынайтын болады.
Қуаныш ЖОЛЫМБЕТ,
«Семей таңы»
