Семейдегі Абай атындағы әмбебап кітапханасында халықаралық мүгедектер күніне орай «Мүмкіндігі шектеулі адамдарды әлеуметтік оңалту мәселелері» тақырыбында дөңгелек үстел өткізілді.
Дөңгелек үстел аясында мүмкіндігі шектеулі азаматтарды қоғамдық ортаға бейімдеу және оңалту мәселелері талқыланды. Жиынды алғы сөзбен ашқан кітапхана директоры Гүлнара Жігітбаева мемлекет тарапынан мүмкіндігі шектеулі жандарға барынша көңіл бөлініп келе жатқанын, Абай атындағы кітапханада да бірқатар әлеуметтік жобалар іске аса бастағанын атап өтті.
— Абай атындағы кітапханада мүмкіндігі шектеулі жандардың қажеттіліктеріне баса назар аудару дәстүрі қалыптасқан. Осы мақсатта кітапханада «Книгоноша», «Библиокөмек» әлеуметтік жобалары іске асырылып, «Объектив» атты фотосурет клубы жұмыс жасайды. Бұл бағытта кітапхана қоғамдық ұйымдар, мүгедектер бірлестіктері, әлеуметтік мекемелермен бірлесіп қызмет атқарады, — деген Гүлнара Жігітбаева рухы биік, жігерлі жандардың дендеріне саулық тіледі.
Дөңгелек үстел барысында сөз алған БҰҰ Даму бағдарламасы Семей қаласы бөлімшесінің директоры Жанна Жибраева қаладағы іске асырылып жатқан әлеуметтік жобалар туралы мағлұмат берсе, шаһардағы арнайы әлеуметтік қызметтер көрсету орталығының мамандары әлеуметтік қызметтер туралы құлағдар етті. Ал қалалық жұмыспен қамту және әлеуметтік бағдарламалар бөлімі басшысының міндетін атқарушы Азамат Құрманғалиев мүмкіндігі шектеулі жандарды жұмыспен қамту мен оларға әлеуметтік қызмет көрсету туралы сұрақтарға жауап берді. Дөңгелек үстел барысында медицина университетінің жанынан құрылған волонтерлық топ өкілдері қала тұрғындарын еріктілер қатарына қосылуға шақырды.
Аталмыш іс-шараға «Көмек», «Қазақ зағиптар қоғамы», «Шырақ» мүгедек әйелдер ассоциациясы, «Тіршілік үміті», «Асыл», «Исток», сынды қоғамдық ұйымдар, Д. Қалматаев атындағы медицина колледжі мен медицина университетінің волонтерлық топтары, сонымен қатар колледждерде білім алып жүрген мүмкіндігі шектеулі студенттер мен кітапхананың тұрақты оқырмандары қатысты. Шара соңында волонтерлық топ өкілдері мен мүмкіндігі шектеулі адамдардың қатысуымен дайындалған шағын музыкалық бағдарлама ұсынылды.
Асан МЫРЗАХАН,
«Семей таңы»
