Семей қаласы әкімінің орынбасары Надежда Шарованың төрағалық етуімен Әйелдер ісі және отбасы-демографиялық саясат жөніндегі қалалық комиссияның кезекті отырысы болып өтті.
Семей қаласы әкімінің орынбасары Надежда Шарова Елбасының «Қазақстан жаңа жаһандық нақты ахуалда: өсу, реформалар, даму» атты Жолдауын жүзеге асыруда комиссияның рөлі мен қалалық комиссияның алдағы уақыттары да ел өркендеуі бағытында жұмыстар атқара беретініне тоқталып өтті. Осы ретте әкім орынбасары еліміздегі гендерлік саясаттың стратегиясын жүзеге асырудағы қосқан үлесі үшін бірқатар азаматтар мен азаматшаларды алғыс хаттармен марапаттады.
Комиссия отырысының күн тәртібінде білім беру мекемелеріндегі оқу-тәрбие процесі барысында гендерлік теңдік саясаты туралы ағарту жұ-мыстарының жүргізілуі мен «ЭКСПО – 2017» жобасы аясындағы жасыл технологияны меңгерудегі тәжірибе сынды екі мәселе қаралды. Алғаш болып сөз алған қалалық білім беру бөлімі басшысының орынбасары Наталья Тегай оқу-тәрбие процесі барысында гендерлік теңдік саясаты туралы ағарту жұмыстарының жүргізілу барысы жайлы ақпараттандырды.
Бұл ретте ол қазіргі таңда нәзік жандардың қоғамдық мәселелерді шешуге белсене араласып, өз құқықтарын қорғауға мүмкіндіктері молынан туғанын, дегенмен гендерлік теңдікке келгенде, таразы басында ерлердің салмағы әлі де басым екені аңғарылып отырғанын алға тартты. Сондай-ақ ол еліміздегі отбасылық-демографиялық және гендерлік саясатқа байланысты іс-шаралар жоспарлы және жүйелі түрде қолға алынғанын ортаға салды. Бұл ретте ол білім беру ошақтарында ауқымды шаралардың атқарылып жатқанын сөз етті. Ең бастысы, енді осы жұмыстарды ары қарай жалғастыру қажет.
Әйелдер ісі және отбасы-демографиялық саясат жөніндегі қалалық комиссияның отырысына саяси партиялар, азаматтық қоғам институты, қалалық мәслихат депутаттары, кәсіпорындар мен ұйымдар басшылары, сондай-ақ БАҚ өкілдері қатысты.
Асан МЫРЗАХАН,
«Семей таңы»
